З'явілася відэа з месца стральбы ў кіраўніка аддзела ДАІ ў Берасці

Затрыманы расказаў пра новыя падрабязнасці інцыдэнту.

Пенсіянера, які раніцай 27 ліпеня страляў з самаробнай прылады ў кіраўніка міжраённага аддзела ДАІ ў Берасці, ужо судзілі за напад на судовага выканаўцу. Гэтую інфармацыю, якая раней з'явілася ў набліжаным да сілавікоў тэлеграм-канале, праграме «Трывожная кнопка» пацвердзілі праваахоўнікі, паведамляе «Брестская газета».

Як раней пісала «Брестская газета», раніцай 9 кастрычніка 2019 года ў адным з кабінетаў аддзела прымусовага выканання (АПВ) Берасцейскага раёна 69-гадовы Аляксандр К. абліў бензінам судовага выканаўцу, ягонае працоўнае месца і падлогу. Ягоныя дзеянні былі кваліфікаваныя следчымі як пагроза гвалту ў дачыненні да службовай асобы, якая выконвае службовыя абавязкі (ч. 1 арт. 366 КК РБ).

На судзе мужчына казаў, што не збіраўся прычыняць супрацоўніку АПВ шкоду, проста хацеў увагі да сябе і сваёй праблемы. Свой учынак ён патлумачыў тым, што быў не згодны з тым, што яго без суда аштрафавалі за язду на мапедзе, які праз адсутнасць дакументаў не атрымалася зарэгістраваць у ДАІ.

«Мне сказалі, будзе суд, я яго чакаў. Я – законапаслухмяны грамадзянін, хоць і стары. А потым, калі атрымліваў пенсію, высветлілася, што без суда і следства з мяне прымусова спагналі штрафы, пазбавілі сродкаў да існавання», – эмацыйна расказваў на судзе пенсіянер.

Пастановай суда Аляксандр К. быў прызнаны вінаватым. Яму было прызначанае пакаранне ў выглядзе аднаго месяца хатняга арышту. Акрамя таго, суд пастанавіў спагнаць з К. у прыбытак дзяржавы 470 рублёў 99 капеек, затрачаных на выдатковыя матэрыялы і рамонт абсталявання пры правядзенні экспертызаў.

Дарэчы, тады экспертыза прызнала мужчыну разумным. Цяпер яго зноў адправяць на псіхолага-псіхіятрычную экспертызу, што вызначыць псіхічны стан. УСК Берасцейскай вобласці 27 ліпеня пачаў крымінальную справу паводле ч. 1 арт.14 і п. 10 ч. 2 арт. 139 (замах на забойства асобы ў сувязі з ажыццяўленнем ёй службовай дзейнасці) Крымінальнага кодэкса Беларусі. Падазраваны затрыманы, з ім працуюць следчыя.