СМІ: Луцкі тэрарыст раздаваў сваім закладнікам грошы
- 28.07.2020, 15:57
- 21,894
Новыя падрабязнасці справы аб захопе закладнікаў ва Украіне.
Максім Крывош, які захапіў ва ўкраінскім Луцку аўтобус і ўзяў закладнікаў, перад сваёй здачай паліцыі папрасіў прабачэння перад імі і раздаў ім грошы, піша unian.net.
Пра гэта гаворыцца ў сюжэце тэлеканала «Аверс». Сцвярджаецца, што Крывош непасрэдна перад здачай прапаноўваў сваім закладнікам узяць пачкі з далярамі, якія былі ў ягонай сумцы. Але са слоў саміх закладнікаў, валюта была сувенірнай і Крывош прапаноўваў яе ўзяць «на памяць».
У сюжэце са спасылкай на крыніцы сцвярджаецца: грошы ўсё ж былі сапраўдныя і людзі іх узялі. Аднак закладнікі не паспелі сабраць усе грошы па аўтобусе, і яны ў момант спецаперацыі былі раскіданыя па салоне.
У паліцэйскім пратаколе ні пра якія грошы не згадваецца. Адвакат Крывоша Сяргей Цімажынскі ў сваю чаргу заявіў, што пры затрыманні ў яго падабароннага канфіскавалі асабістыя сродкі ў суме да 500 грыўняў. Пра якія-небудзь іншыя грошы на месцы тэракту яму невядома.
Як паведамляў УНІАН, раніцай 21 ліпеня ў Луцку ўзброены Максім Крывош захапіў рэйсавы аўтобус з пасажырамі. У закладніках апынуліся 13 чалавек. Увечары ўсе захопленыя грамадзяне былі вызваленыя, а мужчына затрыманы.
Крывашу 44 гады, ён двойчы судзімы. 23 ліпеня суд выбраў Крывашу меру стрымання ў выглядзе арышту без права ўнясення закладу. Яму інкрымінуюць учыненне тэрарыстычнага акту, захоп і ўтрыманне асоб у якасці закладнікаў з пагрозай знішчэння людзей, замах на жыццё супрацоўніка праваахоўнага органа, а таксама незаконнае абарачэнне са зброяй, баявымі прыпасамі або выбуховымі рэчывамі (ч.1 арт.258, ч.2 арт.147 арт.348, ч.1 арт.263 КК Украіны).
У судзе Крывош назваў свой учынак перфомансам.