COVID-19 пакінуў банкаўскую сістэму Расеі без рэзерваў

Аб'ём сумнеўных, праблемных і безнадзейных крэдытаў у банкаўскай сістэме РФ дасягнуў 8,5 трыльёна рублёў.

Такія звесткі прыводзіць Райфайзенбанк у аглядзе сектару за травень, піша finanz.ru.

З агульнага масіву праблемных актываў сфармаванымі рэзервамі на магчымыя страты банкі пакрылі толькі крыху больш за палову – 4,9 трыльёна расейскіх рублёў.

Такім чынам, без пакрыцця застаюцца патэнцыйна дэфолтныя крэдыты на 3,6 трыльёна рублёў. Пры гэтым запас капіталу ў банкаўскай сістэме на 1 траўня складаў 4,2 трыльёна рублёў – на столькі ўласныя сродкі банкаў перавышалі мінімальна дапушчальны ўзровень (8% для звычайных банкаў і 10% – для сістэмаўтваральных).

Іншымі словамі, поўнае рэзерваванне праблемных актываў можа пакінуць банкаўскую сістэму РФ практычна без «падушкі бяспекі». Больш за тое, «пры стварэнні рэзерваў у поўным аб'ёме паказнік дастатковасці для некаторых сістэмаўтваральных банкаў упаў бы ніжэй за мінімальна дапушчальны ўзровень», папярэджваюць аналітыкі Райфайзенбанка.

Каб гэтага не адбывалася, ЦБ увёў рэгулятарныя паслабленні: банкам дазволена не прызнаваць пагаршэнне крэдытнай якасці пазычальнікаў, калі яно адбылося з прычыны COVID-19, і не ствараць рэзервы ў такіх крэдытах.

Пра маштаб рэалізаванай крэдытнай рызыкі сведчаць звесткі на аснове формы 0409115, якія пакуль даступныя толькі за сакавік, паказваюць аналітыкі банка: аб'ём нестандартных, сумнеўных, праблемных і безнадзейных крэдытаў падскочыў на 1,48 трыльёна рублёў. Пры гэтым у актывах на 370 рублёў «вяртанне сродкаў мае блізкую да нуля верагоднасць».

Паблажкі ад ЦБ дзейнічаюць да верасня 2020 года, але з вялікай верагоднасцю рэгулятар падоўжыць іх, мяркуюць у Райфайзенбанку.

Хоць банкаўская сістэма ў цэлым фармальна прадаўжае працаваць «у плюс» (45,4 рублёў за травень), насамрэч увесь прыбытак сектару забяспечвае адзін Ашчадбанк (45,1 млрд рублёў).

Гэта значыць, уся астатняя банкаўская сістэма сумарна спрацавала «ў нуль». Пры гэтым дзель стратных банкаў вырасла з 21% у пачатку года да 29%.

У траўні сумарная страта гэтых арганізацый, да якіх залучаюцца не толькі малыя і сярэднія банкі, склала блізу 11 млрд рублёў.