У Будапешце замежніку пры абмене валют замест форынтаў выдалі старыя беларускія рублі

Ашуканы атрымаў банкноту на пяць тысяч беларускіх рублёў узору 2001 года.

На замежнай форуме Reddit карыстальнік milikadrops (магчыма, з Турцыі) расказаў цікавую гісторыю, піша The Village.

Ён прыехаў у Будапешт паводле праграмы Erasmus. Ім спатрэбілася абмяняць валюту на мясцовыя вугорскія форынты, але абменнікі былі закрытыя.

- Хлопец на вуліцы сказаў, што гатовы памяняць нам грошы, калі мы хочам усё зрабіць хутка. А неўзабаве пасля абмену мы заўважылі, што ў нас зусім не вугорскія форынты (у форынтаў таксама шмат нулёў, і спачатку мы думалі, што ўсё ў парадку). Я пачытаў тэкст на банкноце і зразумеў, што яна з Беларусі. Карацей, нас падманулі. Падкажыце: гэтыя грошы хоць што-небудзь значыць - і як наогул можна пракручваць такія рэчы ў цэнтры Еўропы?

Таксама ён адзначае: «Гэта цалкам наша віна. Было цёмна, і мы толькі праверылі намінал, інакш я б зразумеў, адкуль банкнота. Я нядрэнна ведаю расейскую, каб зразумець гэта, але нічога не стаў чытаць».

Выдадзеная замест форынтаў купюра была банкнотай на 5 000 беларускіх рублёў узору 2001 года - на цяперашнія грошы яе намінал складае 50 капеек (або прыкладна 21 цэнт ЗША). Гэтую купюру можна абмяняць на манету да 31 снежня 2021, але зрабіць гэта можна толькі ў Нацбанку Беларусі. Пачынаючы з 1 студзеня 2022 года банкнота стане несапраўднай.

Пяць тысяч форынтаў, якія разлічваў атрымаць milikadrops пры абмене, - гэта прыкладна 38 беларускіх рублёў (або каля 16 даляраў ЗША).

Адзін з каментатараў піша: «Калі я быў у Вугоршчыне ў 2014-м, шмат разоў бачыў аб'явы з беларускімі купюрамі і перасцярогай: «Гэта не форынты». А сябра, з якім я ездзіў, аднойчы падмануў будапешцкі таксіст: на рэшту ён выдаў інданэзійскія рупіі».

Аўтар допісу робіць выснову, што мабыць, павесіць беларускую банкноту на сцяну свайго пакоя.