Прататып марсіянскага карабля Маска гатовы да першага палёту

Першая місія можа адбыцца ўжо ў 2021.

Шосты па ліку прататып касмічнага карабля Spaceship у натуральную велічыню добра паказаў сябе на агнявых выпрабаваннях рухавікоў Raptor. Цяпер так званы «SN5» гатовы да невялікага палёту на 150 метраў, распавёў Ілан Маск.

Кампанія SpaceX правяла статычныя агнявыя выпрабаванні Starship, запусціўшы адзін рухавік Raptor, усталяваны на шостым па ліку прататыпе сталёвай ракеты з парадкавым нумарам SN5. Апарат заставаўся на пляцоўцы вытворчага комплексу SpaceX у Тэхасе, блізу вёскі Бока-Чыка, паведамляе Space.com, піша «Хайтэк+».

Як толькі выпрабаванні былі скончаныя, кіраўнік кампаніі Ілан Маск паведаміў сваім падпісчыкам ў твітары: «Starship скончыў паўнавартасны агнявы тэст. Хутка скачок на 150 метраў».

SpaceX будуе і тэстуе прататыпы касмічнага карабля Starship з мінулага года, і большасць папярэднікаў SN5 былі так ці інакш знішчаныя ў працэсе выпрабаванняў. Так, SN4 выбухнуў падчас пятых агнявых выпрабаванняў 30 траўня.

Мяркуючы з каментара Маска, найбліжэйшым часам SN5 павінен, нарэшце, падняцца ў паветра. Дагэтуль гэта зрабіць удалося толькі папярэдняму варыянту прататыпа, паменшанай копіі карабля пад назвай Starhopper.

У канчатковай версіі Starship будзе шэсць рухавікоў Raptor. Апарат вышынёй 50 метраў будзе ўсталяваны на гіганцкую звышцяжкую ракету-носьбіт Super Heavy, якой для ўзлёту спатрэбіцца яшчэ 31 рухавік. Агульная вышыня павінна скласці амаль 120 метраў, дыяметр канструкцыі - 10 метраў, а на арбіту карабель зможа выводзіць звыш 150 тон грузу або 100 пасажыраў.

І Starship, і Super Heavy будуць цалкам шматразовымі. Іх першая супольная місія можа адбыцца ўжо ў 2021.