Гамельчука «вылечылі» ад каранавіруса за дзень, але рэнтген не паказалі

Пацыентаў проста выкідваюць на вуліцу.

Лякарні ва ўсёй Беларусі паступова пераводзяцца на звычайны рэжым працы. Паводле звестак Міністэрства аховы здароўя, захворванне на COVID-19 зніжаецца. Высяляць каранавірусных хворых пачалі і ў Гомелі, піша сайт тэлеканала «Белсат».

Гамяльчук Пётр Белавусаў з пацверджаным дыягназам COVID-19 з 15 чэрвеня да 2 ліпеня ляжаў у 3-й гарадской лякарні ў гінекалагічным аддзяленні, якое перапрафілявалі пад каранавіруснае. Мужчыну экстранна шпіталізавалі з двухбаковым запаленнем лёгкіх са шматлікімі паразамі. Тыдзень ён правёў у рэанімацыі пад апаратам штучнай вентыляцыі лёгкіх, мужчыну зрабілі тры рэнтгены.

Вынікі перадапошняга, з 29 чэрвеня, былі несуцяшальныя. Лекарка Пятра, Людміла Вакульчык, сказала, што цуду не адбылося - пра выпіску гаворка не ідзе, і загадала мужчыну застацца на стацыянарным лячэнні. Чарговы рэнтген планавалі на 6 ліпеня, але ўжо 1-га яго адправілі на дакладны здымак і паведамілі, што лёгкія чыстыя.

«Лекарка сказала, што ў мяне нічога няма, што такое здараецца! Лёгкія ў парадку, мяне выпісваюць. Сказала, што рэнтген не пакажа, чаму - не патлумачыла. Мяне проста выкінулі на вуліцу, як валацугу. «Вылечылі» за дзень? Усе хворыя раптам сталі здаровымі. Аднаго мужчыну сілком вывозілі з кіслароднага пакою. Пакет у зубы і пад зад».

Паводле слоў Пятра, ніхто нават не сказаў, што адбываецца, і чаму ўсіх выпісваюць. Аддзяленне неўзабаве вымылі, сабралі бялізну. Людміла Вакульчык - лекарка мужчыны таксама ў грубай форме адмовілася ад тлумачэнняў:

«Павяла сябе па-хамску, агрэсіўна і некарэктна. Сказала, што ў яе няма часу разбірацца. Доктар лечыць не толькі таблеткамі, але і спагадай. Яна палохала ўскладненнямі, а тут адразу вылечыла! Мне не падабаецца ў лякарні, але выходзіць недалечаным рызыкоўна. Нібы ў спіну плюнулі. На іх ціснуць, я разумею. Але падыдзі і скажы нармальна, што такая сітуацыя».

Нягледзячы на жахлівы стан і пагаршэнне самаадчування, Пётр паехаў дадому. Ягоная жонка і сын таксама перахварэлі, тэстаў на каранавірус і КТ ім не рабілі. Лекары сказалі, няма патрэбы - абураецца жонка Пятра Ларыса і падкрэслівае, што за два тыдні да іх ніхто не прыходзіў ні з паліклінікі, ні з санстанцыі:

«Нібыта нас не існуе. Толькі пасля выпіскі мужа прыйшлі. Ніякіх адэкватных лекаў мужу не прапісалі, нічога не напісалі ў рэкамендацыях. Муж не ведае, што адбываецца ў лёгкіх, здаровы ён ці не. Тэмпературы ў яго няма, толькі слабасць і дыхавіца. Цяпер на пытанне мэтазгоднасці рэнтгена праз дзень нам адказалі, што лекарка памылілася!»

Сям'я не выключае, што будзе звяртацца ў пракуратуру, бо 3-я гарадская лякарня Гомеля не ўваходзіла ў спіс Міністэрства аховы здароўя з лякарнямі, якія вяртаюцца да звычайнага рэжыму працы. «Лякарні за дзень вярнулі звычайны статус. Хворыя нікога не хвалююць. Толькі ў Беларусі ў шпіталях каранавірус перамаглі», - кажа Людміла.

Лекарка Людміла Вакульчык для каментароў недасяжная.