Ля базы флоту РФ пад Северадзвінскам абвясцілі эвакуацыю насельніцтва
13- 8.07.2020, 11:14
- 48,312
Што адбылося?
Улады расейскага Северадзвінска прапанавалі пакінуць свае дамы жыхарам Ненаксы - пасёлка, размешчанага паблізу базы Паўночнага флота Расеі, дзе летась у жніўні адбыўся выбух пры выпрабаванні адной з найноўшых ракет.
Сяло трапляе ў небяспечную зону пры правядзенні работ 1-м навуковым цэнтрам вайсковай часці 09703, гаворыцца ў паведамленні на сайце гарадской адміністрацыі Северадзвінска.
Работы будуць праводзіцца з 6:00 7 ліпеня 18:00 8 ліпеня, і ўсім ахвотным выехаць улады дадуць транспартныя сродкі.
7 ліпеня а 5:00 ад вуліцы 40 гадоў Перамогі, 11 будуць адпраўленыя пяць аўтобусаў. Адначасова выезд грамадзян арганізуюць у пасёлку Сопка.
Летась 8 жніўня, нагадаем, пад Ненаксай адбыўся выбух ядзернага міні-рэактара падчас выпрабаванняў у інтарэсах Мінабароны. Загінулі 5 чалавек, у тым ліку і супрацоўнікі Усерасейскага навукова-даследчага інстытута экспэрыментальнай фізікі (РФЯЦ-ВНДІЭФ) у Сарове. Заходнія экспэрты заяўлялі тады, што аварыя магла адбыцца пры выпрабаваннях ракеты з ядзернай рухавіком «Буравеснік» - аднаго з шасці відаў «цуда-зброі», прадстаўленага публіцы прэзідэнтам Уладзімірам Пуціным падчас паслання Федэральнаму сходу ў сакавіку 2018 года.
Адміністрацыя Северадзвінска паведаміла пра «кароткачасовае падвышэнне» радыяцыйнага фону ў горадзе, але праз некалькі гадзін выдаліла паведамленне са свайго сайта.
Расгідрамет пацвердзіў, што ў дзень выбуху ў Северадзвінску быў зафіксаваны скачок радыеактыўнага гама-выпраменьвання ў 4-16 разоў.
Нарвэжскі сейсмалагічны цэнтр (НОРСАР) паведаміў, што надзвычайнае здарэнне суправаджалася двума паслядоўнымі выбухамі, прычым менавіта другі стаў магчымай крыніцай воблака радыеактыўнага ёду, якое выявілі над Скандынавіяй праз дзень пасля інцыдэнту.