Пятрас Аўштравічус: Скасаванне санкцый супраць рэжыму Лукашэнкі было заўчасным
3- 8.07.2020, 16:27
- 19,393
Еўразвяз павінен выкарыстоўваць доўгатэрміновую стратэгію, каб Беларусь стала еўрапейскай.
6 ліпеня ў Брусэлі прайшло пасяджэнне Камітэта Еўрапарламента ў замежных справах, дзе абмяркоўвалася Беларусь.
Сталы дакладчык Еўрапарламента аб Беларусі, еўрадэпутат ад Літвы Пятрас Аўштравічус даў сваю ацэнку сітуацыі ў краіне і стасункам Еўразвяза з Беларуссю, паведамляе карэспандэнт cайта Сharter97.org у Брусэлі.
Прыводзім тэкст ягонага выступу.
«Мы назіраем працэс стварэння саюзнай дзяржавы Расеі ды Беларусі са стварэннем наднацыянальных органаў і прыгнётам суверэнітэту Беларусі.
Яна [саюзная дзяржава] уяўляе найбольшую пагрозу для існавання Беларусі як незалежнай суверэннай дзяржавы, не больш і не менш.
Па-другое, прэзідэнцкая кампанія выявіла нябачаны ўсплёск парушэнняў пакінутых базавых правоў і свабоды выказвання меркавання.
Краіна бачыла нешта такое ў 2010 годзе, такі ўзровень запалохванняў і пераследу блогераў, журналістаў, апазіцыянераў і актывістаў: больш за 400 чалавек арыштаваныя, многія застаюцца ў зняволенні з вельмі дрэннымі ўмовамі і абыходжаннем. Сярод іх вельмі добра вядомыя палітыкі, як Павел Севярынец ці Мікалай Статкевіч.
За гэтым рушылі ўслед масавыя прызнанні несапраўднымі подпісаў за вылучэнне кандыдатаў: у Віктара Бабарыкі было 365 тысяч сабраных подпісаў, але прызнаныя сапраўднымі 175 744; у Валерыя Цапкалы з 160 тысяч толькі 75 249 подпісаў былі прызнаныя.
Мы заклапочаныя ростам узроўню парушэння правоў чалавека, і патрабуем спыніць гвалт.
Па-трэцяе, Беларусь і Расея блізкія да заканчэння атамнай электрастанцыі ў Астраўцы, на самай мяжы з Еўрапейскім Звязам і ўсяго толькі ў 45 кіламетрах ад Вільні, сталіцы Літвы.
Неабгрунтаваны выбар месца, небяспечны метад пабудовы, шматлікія здарэнні, невыкананне рэкамендацый па стрэс-тэстах ствараюць вялізную рызыку з пункту гледжання ядзернай бяспекі для ўсёй Еўропы.
Беларусь сёння сутыкаецца з праблемамі некантраляванага і афіцыйна непрызнанага распаўсюджвання каранавіруса, палітычнага пераследу і нарастаючай ядзернай пагрозы для Еўропы.
Будзем шчырымі, скасаванне санкцый у 2016 годзе была заўчаснай і наўрад ці абгрунтаванай пастановай, якая не забяспечыла паляпшэнне сітуацыю ў Беларусі.
Больш станоўча мы ацэньваем пагадненне паміж ЕЗ і Беларуссю аб спрашчэнні візавага рэжыму - найлепшы спосаб заахвочвання кантактаў паміж людзьмі. Чакаю яго выкарыстання ў жыцці.
Палітыка ЕЗ у дачыненні да Беларусі павінна быць заснаваная не на спалучэнні бізуна і перніка, бо адно ці другое можа стацца празмерным або недастатковым, але на прынцыповым ужыванні доўгачасовай стратэгіі, каб Беларусь стала еўрапейскай».