Літва забараніла трансляцыю Russia Today на сваёй тэрыторыі

Раней тое ж самае зрабіла Латвія.

Літоўская камісія што да радыё і тэлевізіі (ЛКРТВ) забараніла трансляцыю расейскага тэлеканала RT у Літве праз сувязі з расейскім прапагандыстам Дзмітрыем Кісялёвым, які знаходзіцца ў чорным спісе Еўразвязу (ЕЗ). Кісялёў знаходзіцца пад санкцыямі ЕЗ як асоба, якая мае ролю «ў падтрымцы расейскай прапагандай ажыццёўленай у 2014 годзе анэксіі Крыма і прадаўжэння ваеннай дзейнасці Расеі на Усходзе і Паўднёва-Усходзе Украіны», паведамляе «Настоящее время».

«З улікам інфармацыі Міністэрства замежных спраў Літоўская камісія што да радыё і тэлевізіі пастанавіла спыніць рэтрансляцыю на тэрыторыі Літоўскай Рэспублікі пяці праграм RT», - заявіў 8 ліпеня старшыня камісіі што да радыё і тэлевізіі Мантас Марцішус. З ягоных слоў, пастанова набывае моц з чацвярга.

Марцішус падкрэсліў, што пастанова спыніць праграмы прынятая менавіта з прычыны санкцыяў у дачыненні да Кісялёва, а не з прычыны якіх-небудзь парушэнняў з боку тэлеканала - на гэтую прычыну прадстаўнікі RT не ўдзельнічалі ў пасяджэнні.

«Праграмы спыняюцца не з прычыны парушэнняў, а таму, што ў спіс асоб, якія падпадаюць пад санкцыі, унесеная асоба, звязаная з праграмамі гэтай тэлевізіі. Гэта спадар Кісялёў - ён не павінен атрымліваць выгаду, таму рэтрансляцыя праграм спыняецца. Гэта было зроблена ў Латвіі, а цяпер - і ў Літве», - дадаў ён.

Нацыянальная рада што да электронных СМІ Латвіі 30 чэрвеня з той жа прычыны таксама забараніла вяшчанне ў краіне сямі тэлеканалаў расейскай дзяржаўнай групы RT.

Паводле звестак ЛКТРВ, у Літве паказваюць пяць каналаў групы RT: сам RT, яго версію RT HD, таксама RT Spanish, RT Documentary і RT Documentary HD. Іх рэтранслююць аператары кабельнай і іншай тэлевізіі Balticum, Consilium Optimum і Penki kontinentai, а таксама інтэрнэт-тэлевізія megogo.net.