Студэнтам МІУ прапануюць перавесціся ў іншую ВНУ

Для гэтага трэба здаць да 17 прадметаў і заплаціць да 3,5 тысяч рублёў.

У Менскім інавацыйным універсітэце зноў неспакойна. Студэнты спецыяльнасці «праграмнае забеспячэнне інфармацыйных тэхналогій» паведамляюць, што цяпер ім прапануюць перавесціся ў Беларускі дзяржаўны тэхналагічны ўніверсітэт. Для гэтага, напрыклад, студэнтам, якія скончылі трэці курс трэба здаць 17 прадметаў і заплаціць больш за 3 тысячы рублёў за ліквідацыю акадэмічнай розніцы - такую інфармацыю ім агучылі на агульным сходзе. У выпадку, калі яны вырашаць працягнуць вучобу ў МІУ, студэнты могуць застацца без дыплома дзяржаўнага ўзору, піша tut.by.

Што за сітуацыя склалася ў МІУ?

У 2019 годзе Менскі інавацыйны ўніверсітэт павінен быў прайсці акрэдытацыю спецыяльнасцяў, без наяўнасці якой ВНУ не можа выдаваць выпускнікам дыпломы дзяржаўнага ўзору. Яе праводзіў Дэпартамент кантролю якасці адукацыі, які ўваходзіць у структуру Міністэрства адукацыі.

У лістападзе 2019 года Менскі інавацыйны ўніверсітэт атрымаў адмову ў акрэдытацыі пяці спецыяльнасцяў. Гэта «правазнаўства», «эканоміка і кіраванне на прадпрыемстве», «праграмнае забеспячэнне інфармацыйных тэхналогій», «транспартная лагістыка» і «псіхалогія». На іх вучылася большасць студэнтаў ВНУ - больш за 1500 чалавек.

У сакавіку 2020 года МІУ распачаў спробу яшчэ раз прайсці дзяржаўную акрэдытацыю, але і на гэты раз беспаспяхова.

У выніку ўніверсітэт знайшоў магчымасць перавесці сваіх выпускнікоў у іншыя ВНУ, каб яны змаглі абараніцца і атрымаць пасля заканчэння дыплом дзяржаўнага ўзору. Як распавядаў рэктар МІУ Мікалай Суша, апошні месяц студэнты давучвацца ў Полацкім дзяржаўным універсітэце, БІП - Інстытуце правазнаўства, Інстытуце прадпрымальніцкай дзейнасці.

Астатнія курсы, са слоў Мікалая Сушы, працягвалі вучыцца ў звычайным рэжыме, прыёмная кампанія таксама ішла згодна з раскладам. У сакавіку 2021 года ВНУ зноў планаваў падаць заяўку на акрэдытацыю.

Што ў ВНУ адбываецца цяпер?

1 ліпеня, распавядаюць студэнты МІУ, для студэнтаў дзённага навучання і завочнікаў спецыяльнасці «праграмнае забеспячэнне інфармацыйных тэхналогій» прайшоў агульны сход. На ім прысутнічалі рэктар МІУ Мікалай Суша і прадстаўнік Беларускага дзяржаўнага тэхналагічнага ўніверсітэта.

На сустрэчы рэктар МІУ рэкамендаваў сваім студэнтам перавесціся ў БДТУ, з якім была дасягнутая папярэдняя дамоўленасць аб пераводзе. Ён падрабязна растлумачыў, чым выкліканая такая неабходнасць.

Рэктар распавёў, што на гэты момант акрэдытацыю атрымалі толькі дзве спецыяльнасці першай ступені навучання - «дызайн» і «сучасныя замежныя мовы». То бок студэнты спецыяльнасці «праграмнае забеспячэнне інфармацыйных тэхналогій» патэнцыйна могуць застацца без дыплома.

Са слоў Мікалая Сушы, падрыхтоўка спецыялістаў у Менскім інавацыйным універсітэце выклікае сумневы ў Міністэрстве адукацыі, хоць падчас выніковай атэстацыі ў іншых ВНУ былыя студэнты МІУ атрымалі высокія ацэнкі - ад 7 да 10 балаў.

Мікалай Суша нагадаў, што ў сакавіку наступнага года ВНУ трэба будзе прайсці чарговую акрэдытацыю, аднак пакуль, уважае рэктар, усё кажа пра тое, што гэты працэс будзе ангажаваным, і прайсці яе паспяхова наўрад ці атрымаецца.

Таму, каб мінімізаваць рызыкі і зняць напружанне і з саміх студэнтаў, і з іх бацькоў, МІУ прапануе навучэнцам перавесціся ў іншыя ўстановы адукацыі.

Што студэнтам неабходна для пераводу?

Згодна з заканадаўствам, для пераводу ў іншую ВНУ студэнт павінен атрымаць згоду прымаючага боку і свайго ўніверсітэту, а таксама здаць акадэмічную розніцу.

Напрыклад, тым, хто скончыў першы курс МІУ па спецыяльнасці «праграмнае забеспячэнне інфармацыйных тэхналогій», трэба здаць чатыры прадметы і, па разліках прадстаўніка БДТУ, заплаціць 1066 рублёў.

Для тых, што скончылі другі курс акадэмічная розніца складзе 12 прадметаў, якая папярэдне будзе каштаваць 2664 рублі.

Студэнтам, якія скончылі трэці курс і хочуць перавесціся на чацвёрты, трэба здаць 17 прадметаў і заплаціць прыкладна 3500 рублёў за ліквідацыю акадэмічнай розніцы.

Таксама ў студэнтаў ёсць магчымасць перавесціся на курс ніжэй.

Дарэчы, здаць акадэмічную розніцу трэба на працягу аднаго семестра, што, са слоў студэнтаў, будзе вельмі складана з улікам асноўнай нагрузкі па вучэбнаму плану.

- Тых, хто вырашыць застацца ў МІУ, рэктар папярэдзіў, што яму прыйдзецца зрабіць новую калькуляцыю, з прычыны якой цэны за навучанне паднімуцца. Напрыклад, калі з групы ў 20 чалавек застанецца пяць, то кошт навучання для нас вырасце ў чатыры разы, - кажа студэнт МІУ. - Пры гэтым далёка не факт, што пасля заканчэння нам выдадуць дыплом дзяржаўнага ўзору. Атрымліваецца, альбо нас пакідаюць без дыплома і павышаюць кошт навучання, альбо пераводзяць у БДТУ, дзе мы павінны заплаціць да 3500 рублёў за перавод і неяк здаць да 17 прадметаў (лабараторныя, курсавыя, экзамены) па акадэмічнай розніцы за адзін семестр.

Што будзе з МІУ ў найбліжэйшай будучыні?

Аляксей Патоцкі, першы прарэктар Менскага інавацыйнага ўніверсітэта, пацвердзіў, што сустрэча з удзелам студэнтаў, адміністрацыі ВНУ і прадстаўніка БДТУ сапраўды праходзіла.

- Наколькі мне вядома, тое, што было прапанавана нашымі калегамі з іншага ўніверсітэта, задаволіла не ўсіх студэнтаў. Таму яны працягваюць вучыцца ў нас і маюць намер прыступіць да заняткаў з 1 верасня.

У астатнім, сказаў Аляксей Патоцкі, яму няма чаго дадаць да таго, што ўжо агучваў рэктар МІУ Мікалай Суша.

- Рэктар досыць выразна акрэсліць стратэгію ўніверсітэта на найбліжэйшую перспектыву і намер прайсці акрэдытацыю спецыяльнасцяў. Дадаць да гэтага ў мяне няма чаго. Адносна пераводу студэнтаў у іншыя ВНУ... Гэты працэс заўсёды ажыццяўляўся ў канікулярны перыяд у адпаведнасці з пастановай Савета міністраў. У нас ёсць асобныя выпадкі, калі студэнты пераходзяць у іншыя ВНУ, дзе яны хочуць працягнуць навучанне. Масавага характару ў гэтага няма.

Нагадаем, са слоў Мікалая Сушы, МІУ мае намеру падаваць чарговую заяўку на акрэдытацыю ў сакавіку 2021 года.

Як на сітуацыю з МІУ рэагуе Міністэрства адукацыі?

6 лістапада 2019 года стала вядома, што Менскі інавацыйны ўніверсітэт не прайшоў акрэдытацыю спецыяльнасцяў.

Са слоў Мікалая Сушы, усе крытэрыі, якія трэба было выканаць, ВНУ выканала, хоць і былі парушэнні, якія рэктар МІУ назваў нязначнымі.

У той жа дзень пра сітуацыю выказаўся міністр адукацыі Ігар Карпенка. Ён запэўніў студэнтаў, што ім не варта хвалявацца, бо ў адпаведнасці з заканадаўствам на пастанову Міністэрства адукацыі студэнты змогуць працягнуць адукацыю ў іншых ВНУ паводле сваіх спецыяльнасцяў з наступнай выдачай дыплома дзяржаўнага ўзору.

Рэктару МИУ Мікалаю Сушы ён «парэкамендаваў бы не маніпуляваць грамадскай думкай, а паглыбіцца ў сутнасць рэкамендацый камісіі, ліквідаваць выяўленыя недахопы і арганізаваць адукацыйны працэс у адпаведнасці з нормамі заканадаўства».

Нягледзячы на гэта, 11 лістапада 2019-га студэнты зладзілі аднадзённую забастоўку. На наступны дзень з імі сустрэліся прадстаўнікі Міністэрства адукацыі.

Начальнік галоўнага ўпраўлення прафесійнай адукацыі Міністэрства адукацыі Сяргей Каспяровіч прапанаваў студэнтам два варыянты. Першы - працягнуць навучанне ў Мінскім інавацыйным універсітэце. Для гэтага ВНУ трэба ўлічыць заўвагі камісіі і прайсці паўторную акрэдытацыю. Другі, калі недахопы не будуць выпраўленыя і ВНУ не пройдзе акрэдытацыю, - міністэрства дапаможа студэнтам перавесціся ў іншыя ВНУ.

Пры гэтым ён адзначыў, што асноўныя заўвагі атэстацыйнай камісіі тычыліся тых, хто вучыцца ў МІУ не на дзённым навучанні, а дыстанцыйна.

Праз некалькі месяцаў пазіцыя Міністэрства адукацыі стала гучаць па-іншаму.

У адказе ад 20 красавiка 2020-га на запыт аднаго са студэнтаў МІУ першая намесніца міністра адукацыі Ірына Старавойтава ўказала, што «ў выпадку спынення падрыхтоўкі ў МІУ па неакрэдытаваных спецыяльнасцях пры наяўнасці згоды студэнтаў магчымы працяг навучання ў іншай установе вышэйшай адукацыі». Аднак зараз пра гэта павінен клапаціцца заснавальнік ВНУ, у гэтым выпадку - рэктар МІУ Мікалай Суша.