Мінфін ЗША аштрафаваў Amazon за дастаўку тавараў у Крым

Пастаўкі сталі парушэннем санкцыйных праграм.

У сувязі з дастаўкай тавараў у Іран, Сірыю і анэксаваны Крым у перыяд з 2011 да 2018 года кампанія Amazon павінна будзе выплаціць амаль 135 тысяч даляраў штрафу.

Міністэрства фінансаў ЗША аштрафавала кампанію Amazon за пастаўкі тавараў у перыяд з лістапада 2011 да кастрычніка 2018 гадоў у Іран, Сірыю і анэксаваны Расеяй Крым. Акрамя таго, у гэты перыяд онлайн-рытэйлер прымаў заказы ад асоб, якія знаходзяцца ў замежных прадстаўніцтвах Кубы, Ірана, Паўночнай Карэі, Судану і Сірыі, гаворыцца ў дакуменце, апублікаваным на сайце Мінфіна ЗША, паведамляе dw.com.

Гэтыя пастаўкі з'яўляліся парушэннем санкцыйных праграм, уведзеных кіраўніцтвам кантролю за замежнымі актывамі (OFAC), тлумачыцца на сайце Мінфіна. Са звестак OFAC, кампанія Amazon не правярала належным чынам адрасы і імёны кліентаў, кантралюючы гэтыя звесткі ў сувязі з санкцыямі.

Паводле закону максімальная сума штрафу за відавочнае парушэнне гэтых прадпісанняў складае 1 038 206 212 даляраў, пазначылі ў Мінфіне. Аднак OFAC ўлічыла той факт, што кампанія Amazon добраахвотна паведаміла аб парушэнні, а таксама тое, што гэта парушэнне не з'яўляецца асабліва цяжкім, і прызначыла штраф сумай 134 523 даляраў.

Гэта палова сумы ўсіх трансакцый, зробленых з парушэннем заканадаўства. Менавіта яна вызначае базавую суму штрафу за такія парушэнні.