Карабель Маска з экіпажам спусціцца на Зямлю

Відэатрансляцыя.

Сёння, 1 жніўня, у зваротны шлях – з Міжнароднай касмічнай станцыі на Зямлю – павінен адправіцца экіпаж пілатаванай тэст-місіі Crew Dragon "Endeavour" кампаніі SpaceX у складзе Боба Бенкена і Дага Хёрлі. Яны стартавалі 30 траўня 2020 года з пляцоўкі LC-39а ў Касмічным цэнтры Кэнэдзі, і 31 траўня даляцелі да МКС, паведамляе liga.net.

Надвор'е ў патэнцыйных кропках прываднення (верагодна, усё ж на захад ад Флорыды – у Мексіканскім заліве) пакуль што здавальняльнае. Працэсу можа перашкодзіць ураган Ісаяса, які цяпер знаходзіцца над Багамскімі астравамі і павольна рухаецца ў бок Касмічнага ўзбярэжжа. Парывы ветру ў эпіцэнтры дасягаюць 150 км/г.

Меркаванае месца пасадкі – прыбярэжная паласа ў дыяпазоне паміж Пенсакола і Панама-Сіці з адлегласцю да берагу ад 40 да 325 км. Прыкладна за шэсць гадзінаў да адстыкоўкі ад МКС будзе прынятая фінальная пастанова – ляцець ці не.

Маса карабля з усім грузам пры адчальванні – прыкладна 12,5 т. Плануецца, што праз 6 г палёту Crew Dragon выйдзе на патрэбную траекторыю для зыходу з арбіты. Перад гэтым ад яго аддзеліцца грузавы адсек – ён згарыць у атмасферы, і карабель "палягчэе" да 9,6 т. Цеплашчыт капсулы пры спуску з хуткасцю блізу 28 000 км/г разагрэецца амаль да 2000°С. Прыкладна шэсць хвілінаў праз перашкоды сувязі з экіпажам не будзе. Выцяжныя парашуты выпусцяць на хуткасці 560 км/г на вышыні 5,5 км, а галоўныя спрацуюць на вышыні ўсяго 1,8 км пры хуткасці 190 км/г.