Уладзімір Жырыноўскі: Гэта агонія рэжыму, Лукашэнка збяжыць з Беларусі

Супраць яго паўстала ўся Беларусь.

Кіраўнік ЛДПР Уладзімір Жырыноўскі пракаментаваў выбары ў Беларусі і ўжыванне сілы да дэманстрантаў, якія не паверылі ў афіцыйныя звесткі ЦВК аб «перамозе» Лукашэнкі. Усё, што адбылося, ён назваў агоніяй рэжыму і прадказаў, што Лукашэнку давядзецца ўцякаць з краіны.

«У гэтай краіне адключылі інтэрнэт, не працуюць мэсэнджары, сацыяльныя сеткі, затрыманыя многія журналісты. Гэта не сучасны еўрапейскі стыль, а штосьці больш блізкае да Сярэднявечча, - перадае словы лідара ЛДПР сайт арганізацыі. - Мы выказваем салідарнасць з усімі, хто трапіў пад рэпрэсіі, перш за ўсё, з груба затрыманымі журналістамі расейскага тэлеканала «Дождь». Яны нічога не парушалі і павінны быць вызваленыя.

Мы перакананыя, што па-за залежнасцю ад таго, якія вынікі абвесцяць, Лукашэнка будзе не святкаваць, а, хутчэй, плакаць. Выбарнікі Беларусі ўжо адмовілі ў даверы Лукашэнку і больш не хочуць жыць за ім. Ім патрэбная свабода і павага. Таму ў канчатковым рахунку Аляксандра Рыгоравіча чакае лёс Януковіча».

«Людзі выходзяць на вуліцу там, дзе ўлада праяўляе непавагу і выкарыстоўвае сілу. Гэта дзікунства і ганьба саджаць у турму вылучэнцаў у кандыдатаў на прэзідэнта, а потым у ноч падліку галасоў арыштоўваць дэманстрантаў. Вядома ж, уся Беларусь паўстала супраць Лукашэнкі. Сёння мы назіраем ягоную канчатковую паразу. Ён саступіў не толькі моладзі, але і сярэдняму і старэйшаму пакаленню, не толькі грамадзянскім, але і тым, хто ў пагонах – усёй краіне, - распавёў палітык. - Не прайшла ў Беларусі дыктатура Лукашэнкі. Гэта канец бальшавіцкаму рэжыму.

Дзякуй беларусам. Малайцы! Нарэшце, набраліся мужнасці і сказалі жорсткае не дыктатуры. Няхай жыве вольная Беларусь!».