Міністэрства аховы здароўя РФ паведаміла пра пачатак вытворчасці вакцыны ад COVID-19

Большасць расейскіх медыкаў ёй не давярае.

Расея пачала вытворчасць вакцыны ад каранавіруснай інфекцыі, распрацаванай навукова-даследчым цэнтрам эпідэміялогіі імя Гамалеі. Пра гэта РБК паведамілі ў Міністэрстве аховы здароўя.

Камбінаваная вектарная вакцына «Гам-Кавіда-Вак» вырабляецца ў выглядзе флаконаў 0,5 мл. У дзвюх асобных скрынках знаходзіцца першы і другі кампанент вакцыны. Іх ін'екцыя вырабляецца нутрыцягліцава.

Пра рэгістрацыю першай айчыннай вакцыны ад COVID-19 абвесціў прэзідэнт Уладзімір Пуцін 11 жніўня. Ён адзначыў, што прэпарат стварае ўстойлівы імунітэт і не дае сур'ёзных пабочных эфектаў. Кіраўнік дзяржавы дадаў, што адна з ягоных дачок зрабіла сабе ін'екцыю вакцыны, пасля чаго ў яе два дні нязначна павышалася тэмпература.

Кіраўнік нацыянальнага даследчага цэнтра эпідэміялогіі і мікрабіялогіі імя Гамалеі Аляксандр Гінцбург паведаміў, што ахоўныя ўласцівасці вакцыны будуць захоўвацца цягам як мінімум двух гадоў.

Апытанне сэрвісу «Даведнік лекара» паказала, што большая частка медыкаў краіны не давярае расейскай вакцыне. У Міністэрстве аховы здароўя такое стаўленне назвалі нармальным, адзначыўшы, што давер да прэпарату заваёўваюць гадамі.