У СІЗА да паўсмерці збіты старшыня Беларускага незалежнага прафзвязу

Лекары не аказваюць Мікалаю Зіміну дапамогу.

Старшыня Беларускага кангрэсу дэмакратычных прафзвязаў Аляксандр Ярашук паведаміў у «Фэйсбуку» пра збіццё ў СІЗА старшыні Беларускага незалежнага прафзвязу Мікалая Зіміна. Са слоў Аляксандра Ярашука, ён знаходзіцца пры смерці, а медыкі не аказваюць яму дапамогу.

Старшыня Беларускага кангрэсу дэмакратычных прафзвязаў звярнуўся ў Міжнародную арганізацыю працы і Міжнародную канфедэрацыю прафзвязаў, каб яны ўмяшаліся ў сітуацыю.

«Сёння, 15 жніўня 2020 года, ад сукамернікаў, якія выйшлі на свабоду, сталі вядомыя падрабязнасці ўтрымання ў СІЗА г. Любань былога старшыні Беларускага Незалежнага прафзвязу Мікалая Зіміна. Паводле іх інфармацыі, Мікалай Зімін быў жорстка збіты і практычна не перасоўваецца, знаходзіцца ў крытычным стане, фактычна - пры смерці. Пры гэтым ніякая медыцынская дапамога Мікалаю не аказваецца.

Мікалай Зімін быў асуджаны 10 жніўня 2020 года судом Салігорскага раёна на 25 дзён адміністрацыйнага арышту за ўдзел у мірнай акцыі пратэсту супраць фальсіфікацыі прэзідэнцкіх выбараў у Беларусі.

Просім вашага экстранага ўмяшання з прымусам беларускіх уладаў да аказання неадкладнай медыцынскай дапамогі Мікалай Зімін і спынення яго збіцця і катаванняў.

З павагай, Аляксандр Ярашук, старшыня Беларускага кангрэсу дэмакратычных прафзвязаў, Віцэ-прэзідэнт МКП, сябра Адміністрацыйнай рады МАП», - напісаў у сваім лісце Аляксандр Ярашук.