Новы ўрад Беларусі павінны сфармаваць Статкевіч, Севярынец, Ціханоўскі і Бабарыка
173- Зміцер Бандарэнка
- 17.08.2020, 15:30
- 253,156
А мы павінны вызваліць іх як мага хутчэй.
Яшчэ мінулай восенню 2019 года беларускія блогеры на адной з масавых акцый узнялі пытанне «Што далей?». За гэты час сітуацыя ў краіне радыкальна змянілася, але адказ на гэтае пытанне стаіць перад намі з неверагоднай вастрынёй.
Шмат хто ў Беларусі і за мяжой дзівіцца, чаму пратэсты адбываюцца без выступленняў палітычных лідараў, чаму беларусы самаарганізуюцца праз інтэрнэт і хто возьме на сябе кіраванне краінай.
Мне здаецца, што адказ на гэтае пытанне на самай справе вельмі просты. Да ўлады ў краіне павінны прыйсці людзі, якія заслужылі гэта сваёй барацьбой, сваёй сумленнасцю, сваёй паслядоўнасцю. І, вядома, тыя, каго падтрымлівае народ Беларусі.
Прэзідэнцкія выбары ў Беларусі не былі сумленнымі і справядлівымі ў першую чаргу таму, што ў іх не змаглі ўдзельнічаць найбольш моцныя кандыдаты – Мікола Статкевіч, Павал Севярынец, Сяргей Ціханоўскі, Віктар Бабарыка.
Іх знаходжанне сёння ў засценках рэжыму – гэта пацвярджэнне страху Лукашэнкі перад імі, а таксама сведчанне іх сілы.
Не трэба мучаць Святлану Ціханоўскую. Мы павінны падзякаваць гэтай выдатнай жанчыне за тое, што яна, пераадольваючы сумневы і страх, прайшла вельмі нялёгкі шлях да 9 жніўня 2020 года. Яна дапамагла абудзіць Беларусь, і геніяльнасць яе выбарчай праграмы складалася ў простым сказе: «Я не хачу ўлады, галасуйце за мяне, і ў краіне пройдуць новыя свабодныя выбары». Праз пагрозы, страшны ціск Святлана была вымушаная з'ехаць.
Але нашы ворагі памыліліся: беларусы прадоўжылі супраціў дыктатуры з яшчэ большай энэргіяй, вытрымалі нечалавечыя ў жорсткасці атакі халуёў рэжыму, перайшлі ў наступ і амаль дамагліся перамогі.
Але немагчымая змена ўлады без вызвалення нашых лідараў, таксама як не былi магчымымі змены ў свой час у ПАР без вызвалення Нэльсана Мандэлы. У Польшчы – без вызвалення Леха Валенсы. У Чэхаславакіі – без вызвалення Вацлава Гавала.
Палітычная пастанова вельмі простая: вызваленыя Мікола Статкевіч, Павал Севярынец, Сяргей Ціханоўскі і Віктар Бабарыка павінны дамовіцца і сфармаваць Кааліцыйны ўрад нацыянальнага даверу. Беларусы на ўсенародным мільённым веча павінны абвесціць вяртанне да законнай Канстытуцыі 1994 года і цягам некалькіх месяцаў у Беларусі павінны прайсці выбары прэзідэнта і парламента паводле гэтай Канстытуцыі. Святлана Ціханоўская павінна добраславіць гэтых мужных і дасведчаных палітыкаў на стварэнне такога ўрада.
Ні ў якім разе нельга ісці на падставе ў тых дарадцаў, якія прапануюць Святлане самой стаць эрзац-прэзідэнтам і фармаваць адміністрацыю прэзідэнта паводле лукашэнкаўскай канстытуцыі з неабмежаванымі паўнамоцтвамі.
У нас няма часу на эксперыменты. Людзі, якія даказалі сваю мужнасць і кампетэнтнасць цягам усяго жыцця, змогуць узначаліць краіну, правесці выбары і неабходныя рэформы, якія зробяць Беларусь нармальнай еўрапейскай краінай і забяспечаць годны ўзровень жыцця і бяспеку яе грамадзянаў.
Свабоду Міколу Статкевічу, Паўлу Севярынцу, Сяргею Ціханоўскаму, Віктару Бабарыку і ўсім палітвязням!
Жыве Беларусь!
Зміцер Бандарэнка, каардынатар грамадзянскай кампаніі «Еўрапейская Беларусь»