Сашу больш не тэлефануйце

Толькі разам - і толькі перамога.

- Здароў, а Сашу можна?

- А Саша не выйдзе. Ідзіце дадому, дзеці.

Гэта - кароткі вынік дзейнасці каардынацыйнай рады. Пазасядала ўволю і наважылі ўвайсці ў кантакт з адміністрацыяй Сашы тры працэнты. Але там з імі ніхто размаўляць не стаў. А на наступны дзень яшчэ і крымінальную справу распачалі, каб дурныя дзеткі сваімі званкамі не заміналі дарослым дзецюкам важныя справы рабіць.

Не выключаю, што ўсе тыя, хто ўвайшоў у гэтую незразумелую і непаваротлівую структуру, - самі па сабе выдатныя людзі. Але яны здзейснілі некалькі фатальных памылак.

Па-першае, абвясцілі, што хочуць дыялогу, і што ўлада да дыялогу гатовая. На карысць гэтага сцвярджэння многія з іх (і асабліва з тых, хто спачувае) сцвярджалі, што нават з тэрарыстамі трэба весці перамовы дзеля вызвалення закладнікаў. Перамовы з тэрарыстамі - так. Але дыялог з тэрарыстамі - гэта зусім іншае. Гэта супольны кубачак гарбаты ў захопленым будынку. Парцэляны сэрвіз, які спакойна бразгоча сярод трупаў. Накрухмаленыя сурвэткі, якія акуратна выціраць плямы крыві на стале. Акрамя таго, перамовы з тэрарыстамі вядуць не закладнікі. Перамовы вядуць тыя, хто звонку. Таму што не ў закладнікаў тэрарыст патрабуе мільён даляраў і самалёт.

Закладнікі - тавар, разменная манета. З імі не размаўляюць. У найлепшым выпадку перамовамі можна дамагчыся дазволу лішні раз у прыбіральню схадзіць. А ў нашым выпадку, дарэчы, тэрарыст наогул нікому не выстаўляе ніякіх патрабаванняў. Ён захоплівае закладнікаў проста так, для задавальнення. І забівае іх таксама выключна дзеля задавальнення.

Па-другое, добрыя людзі дзеля нейкай патрэбы заняліся падменай паняццяў. Назвалі Лукашэнку «дзейным прэзідэнтам», абвясцілі, што да 5 лістапада ў яго ёсць паўнамоцтвы і што ён мае поўнае права ўдзельнічаць у выбарах. Гэта значыць замест адстаўкі - два з паловай месяцы легітымнасці і шчодрая прапанова ўдзелу ў выбарах. Ці варта дзівіцца таму, што ён неадкладна скарыстаўся «паўнамоцтвамі» і загадаў распачаць крымінальную справу ў дачыненні да каардынацыйнай рады?

Па-трэцяе, не ўлічылі - ці забыліся? - што любая бюракратыя забівае пратэсты. Пачынаецца імітацыя бурнай дзейнасці, справаздачы ў медыя і поўнае аддаленне грамадства ад тых, хто надумаў паблізу ад барыкад заняцца бюракратычнымі дзеяннямі. «Каардынацыйная рада абрала прэзідыум». «Каардынацыйная рада прыняў рэзалюцыю». Ад гэтага пачынае зводзіць сківіцы і ў тых, хто вырваўся з катоўні пекла, і ў тых, каму пашчасціла ў тое пекла не патрапіць. Таму што далейшае развіццё падзей можна лёгка прадбачыць. Каардынацыйная рада абрала рэвізійную камісію. Каардынацыйная рада заслухала дакладчыка. Каардынацыйная рада абрала ўпаўнаважанага. Каардынацыйная рада правяла справаздачна-выбарчы сход. Гэтую важданіну можна расцягнуць на некалькі гадоў. І ўсе пры справе, і бачнасць палітычнага працэсу. Толькі людзі, якія яшчэ два дні таму пляскалі новай ініцыятыве, сёння абураюцца: «Каго яны прадстаўляюць? Хто даў ім права казаць ад імя народа? Я такую лухту накшталт ўдзелу таракана у выбарах у жыцці не падтрымаў бы!»

Апошняя рэпліка - гэта ўжо па-чацвёртае. І, напэўна, самае галоўнае. Няма шанцаў у тых, хто спрабуе змяняць не ўладу, а волю народа. (Лукашэнка, якога рабочыя сёння асвістваюць і пасылаюць на тры літары, - лепшае таму пацверджанне.) Новая бюракратычная структура перш за ўсё, узяўшы на сябе адказнасць прадстаўляць народ, тут жа забылася пра народныя патрабаванні. А галоўнае з іх - адстаўка Лукашэнкі. Адстаўка, а не паўнамоцтвы да 5 лістапада з наступным удзелам у выбарах! Такога людзі не даруюць. Яны занадта адчувальныя да падману. Яны гатовыя плаціць сваімі жыццямі - а многія ўжо заплацілі - за свабоду сваёй краіны. Але ніхто не пойдзе на плошчу бараніць права злачынцы сядзець у Драздах. І абараняць тых, хто спрабуе даць злачынцу гэта права, таксама ніхто не будзе.

Тым, хто назваў сябе каардынацыйнай радай, трэба гэта зразумець і запомніць. Ведаеце, чаму Лукашэнка менавіта цяпер пачаў крымінальную справу? Ды таму, што ўсе яны ўжо выканалі для яго сваю функцыю і больш не патрэбныя. Яны зрабілі для яго столькі, колькі Вакульчык з Караевым не адужалі: назвалі прэзідэнтам, надзялілі паўнамоцтвамі, ды яшчэ і правам на ўдзел у будучых выбарах. Уласна, менавіта гэтага ён ад іх і чакаў. Цяпер усё - можна адпраўляць іх на памыйніцу. Або ў турму. Скрыпач не патрэбны.

Саша тры працэнты выдатна адчувае чужую слабасць. І калі каардынацыйная рада ўздрыгнула і пачала з жорсткіх фармулёвак народных патрабаванняў рабіць каснічкі з сэрцайкамі (магчыма, з лепшых памкненняў), - ён тут жа гэтым скарыстаўся. Але каб выстаяць, мы павінны быць разам. І калі мы ўсёй краінай не будзем бараніць нашы агульныя патрабаванні - неадкладная адстаўка Лукашэнкі, вызваленне палітвязняў і выбары (без яго, зразумела), - на 5 лістапада краіна захлынецца ў крыві. Прычым не толькі нашай, але і ў крыві каардынацыйнай рады. Так што толькі разам - і толькі перамога. А Сашы больш не тэлефануйце.

Ірына Халіп, спецыяльна для Charter97.org

Калі вам спадабаўся артыкул, вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL 97 1160 2202 0000 0002 1671 1123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com