З Беларусі бягуць інвестары?

У другім квартале адбыўся рэкордны адток грошай.

Міністр эканомікі ашаламіў публіку адкрытым прызнаннем. Выяўляецца, з краіны нядаўна выцекла вялікая сума інвестыцый, піша сайт banki24.by.

У «мёртвы» летні сезон Нацыянальнае агенцтва інвестыцый і прыватызацыі арганізавала міжнародную канферэнцыю. Натуральна, на такой канферэнцыі не магло не выступіць кіраўніцтва Мінэканомікі. Проста таму, што НАІП з'яўляецца падпарадкаванай арганізацыяй міністэрства.

Кіраўнік Мінэканомікі Аляксандр Чарвякоў паведаміў, што пазітыўна ацэньвае прыцягненне наўпроставых замежных інвестыцый на чыстай аснове ў 2020 годзе. З ягоных слоў, за паўгоддзе «іх аб'ём чакаецца на ўзроўні блізу мільярд даляраў», а за ўвесь 2019 год інвестыцый было толькі на 300 млн USD больш.

Дык у чым жа сенсацыйнасць выказванняў міністра?

Наўпроставыя замежныя інвестыцыі на чыстай аснове - балансавы паказчык, гэта валавы прыток інвестыцый без валавога адтоку. Акрамя таго, у гэты паказчык не ўключаюць разнастайныя пазыковыя абавязацельствы тыпу крэдытаў і пазык, крэдыторкі, дэбіторкі, лізінгу і іншых інструментаў.

Можна сказаць, што наўпроставыя інвестыцыі на чыстай аснове - гэта самы адэкватны паказчык, паводле якога можна адсочваць інвестыцыйныя плыні ў Беларусь і з Беларусі. Уласна, урад гэта і робіць ужо некалькі гадоў запар. Гэты паказчык рэгулярна ўваходзіць у лік асноўных у афіцыйным прагнозе на будучы год.

Прагноз што да інвестыцый на 2020 год складае 1,7 млрд USD. Прагноз на 2019-ы быў роўны 1,6 мільярда USD і чыноўнікі яго правалілі.

2020 год пачаўся вельмі бадзёра. Усяго за квартал Беларусь сабрала 1,456 млрд USD замежных інвестыцый - больш, чым за ўвесь мінулы год.

Чаму тады Чарвякоў заявіў пра 1 млрд USD за першую палову 2020 года?

Мяркуючы з усяго, у 2 квартале адбыўся істотны адток інвестыцый з краіны. Памылкі ў словах міністра быць не можа: бо ён спаслаўся, што за 6 месяцаў 2020 года інвестыцыі былі меншыя за вынік 2019-га на 300 млн USD. А за мінулы год акурат і паступіла блізу 1,3 млрд USD.

Значыць, сапраўды за красавік-чэрвень з Беларусі выцеклі 0,4 млрд USD. Гэтая сума з'яўляецца максімальным адтокам інвестыцый за час вядзення статыстыкі згодна з дзейнай методыкай.

Мы нават можам назваць меркаванага галоўнага вінаватага адтоку - гэта «дачка» «Газпрома» ў Беларусі. Паводле нашых разлікаў, у 2 квартале «Газпром трансгаз Беларусь» пералічыў акцыянеру рэкордную суму дывідэндаў - да 839,2 млн BYN.

Таксама 2 квартал традыцыйна выступае перыядам пералічэння дывідэндаў у беларускіх банкаў з замежным капіталам. Калі скласці меркаваныя грашовыя адтокі з «дочкі» «Газпрома» і з банкаў, цалкам можна выйсці на шуканыя 400 млн USD.