The NYT: Трамп імкнецца атрымаць вакцыну ад каранавіруса да выбараў прэзідэнта ЗША

Гэта мусіць павялічыць ягоныя шанцы на перамогу.

Прэзідэнт ЗША Дональд Трамп імкнецца, каб вакцына ад каранавіруса была распрацаваная да выбараў прэзідэнта ў лістападзе гэтага года. Экспэрты асцерагаюцца, што Белы дом будзе прыспешваць навукоўцаў, каб тыя скарацілі тэрміны праверкі вакцыны і далі згоду на вакцынацыю грамадзян краіны да 3 лістапада. Пра гэта 2 жніўня напісала выданне The New York Times пасля інтэрв'ю з амерыканскімі навукоўцамі, прадстаўнікамі адміністрацыі і незалежнымі экспэртамі, піша «Гордон».

У красавіку ў перыяд строгага карантыну ў ЗША міністэрства аховы здароўя і сацыяльных службаў падрыхтавала для адміністрацыі Трампа прэзентацыю праграмы, у якой сцвярджалася, што найлепшы спосаб узяць сітуацыю з распаўсюджваннем віруса пад кантроль - распрацаваць вакцыну супраць COVID-19.

Паводле звестак выдання, у прэзентацыі гаварылася, што шырокі доступ да вакцыны павінен адбыцца ўжо ў кастрычніку гэтага года. Пазней тэрміны былі перанесеныя да канца года.

Чым даўжэй тэстуецца вакцына перад выпускам, тым большая імавернасць, што яна будзе бяспечнай і эфектыўнай. Аднак экспэрты мяркуюць, што Белы дом будзе ціснуць на кантрольныя органы ЗША, каб пэўная колькасць вакцыны з'явілася да выбараў 3 лістапада.

Гэта звязанае з імкненнем прэзідэнта Трампа спыніць распаўсюджванне каранавіруса перад выбарамі прэзідэнта, чым павялічыць свае шанцы на перамогу, піша выданне.