Беларуска, якая жыве ў Бейруце, распавяла пра выбух

Учора ў сталіцы Лібана адбыўся інцыдэнт, які забраў жыцці 100 чалавек.

«Было блізу 6 вечара, мы з сям'ёй знаходзіліся дома. У нейкі момант адчулі штуршок, затым выбуховай хваляй у нас развяло на балконе рассоўныя вокны. Муж выказаў здагадку, што гэта тэракт, пазней у навінах перадалі: у порце адбыўся выбух», - распавядае Алена, якая жыве ў сталіцы Лібана - Бейруце, піша tut.by.

Алена родам з Менска. Чатыры гады таму яна выйшла замуж за лібанца, з тых часоў часта лётае паміж Менскам і Бейрутам. Сёлета каранавірус змяніў яе звыклы графік жыцця, і беларуска ўжо амаль год знаходзіцца ў Бейруце.

Дом, у якім жыве сям'я Алены, размешчаны прыкладна ў сямі кіламетрах ад порта, дзе ўчора адбыўся выбух. На раніцу серады было вядома, што катастрофа забрала жыцці 100 чалавек, блізу чатыры тысячы пацярпелі. Але гэта яшчэ не канчатковыя звесткі. Магутнасць выбуху экспэрты параўналі з землятрусам магнітудай 4,5. Сотні дамоў былі зруйнаваныя і пакарабачаныя.

- Порт знаходзіцца на набярэжнай, гэта, мяркуй, цэнтр горада, - апісвае геаграфію Бейрута Алена. - Там шмат ангараў лагістычных кампаній, офісаў. Выбухам іх проста знесла. Побач стаяць хмарачосы, крамы - у іх вынесла вокны. У навінах паказваюць, што ўсе вуліцы ў тым раёне заваленыя шклом. Шмат пацярпелых з колата-рэзанымі ранамі.

У момант выбуху беларуска з сям'ёй знаходзіліся дома.

- Мы глядзелі тэлевізар, і муж адчуў, што адбыўся нейкі штуршок. Ён нарадзіўся ў 1982 годзе, калі ў Лібане ішла грамадзянская вайна, таму ён вельмі адчувальны да ўсіх нестандартных сітуацый, - узгадвае ўчорашні вечар субяседніца. - «Гэта што, землятрус?» - спытаў ён у мяне. Ды не, кажу. Усё нармальна. Прайшло яшчэ секунд пяць і ў нас на гаўбцы затрэсліся шыбы. Мы адчулі, як справа налева ідзе хваля. Сіла яе была такой, што рассунула закрытыя балконныя рамы. У Лібане ёсць правіла, у выпадку надзвычайнага здарэння трэба трымацца далей ад шыбы. Мы схапілі дзяцей і адбеглі далей ад вокнаў.

Першае, што падумалі Алена з мужам, - у горадзе здарыўся тэракт. Аб здарэнні тут жа перадалі на тэлевізіі. У экстраных навінах паведамілі: у порце адбыўся выбух.

- У навінах перадавалі, што пасля выбуху ў паветра патрапілі нейкія небяспечныя рэчывы, таму ўсім рэкамендавалі заставацца дома, - кажа Алена. - У чатах адразу сталі пісаць, што ў кватэрах павыбівала шыбы. Людзям раілі завешваць вокны мокрымі прасцінамі. Тых, хто ўсё ж наважыцца выйсці на вуліцу, прасілі надзець мокрыя павязкі.

Алена з мужам патэлефанавалі сябрам і родным, з усімі усё было ў парадку. Бліжэй да васьмі вечара, каб трохі развеяцца, яны выйшлі на вуліцу. Праехаліся па раёне - дамы ў акрузе былі цэлыя. Беларуска нават не заўважыла, што дзесьці выбітыя шыбы.

- У горадзе ў асноўным пацярпелі будынкі старой пабудовы, новыя дамы будуюць з улікам сейсмалагічнай абстаноўкі. Напэўна, гэта і дапамагло ім выстаяць, - дзеліцца здагадкамі беларуска.

Тры дні ў Бейруце жалоба. Не працуюць крамы, кавярні, рэстарацыі, кампаніі. У сувязі з гэтым да канца тыдня мужу Алены не трэба выходзіць на працу.

- У навінах перадалі, што раніцай усе шкодныя рэчывы, якія былі ў паветры праз выбух, апалі з расой, таму сёння можна выходзіць на вуліцу без маскі, - апісвае сітуацыю суразмоўца. - Настрой у людзей вельмі дэпрэсіўны. Шматлікія крамы ў цэнтры цалкам шкляныя. Нядаўна паказалі, як іх уласнікі прыходзяць туды, каб прыбраць шыбы і засцерагчы тэрыторыю.

Са слоў суразмоўніцы ў дамах, размешчаных бліжэй да цэнтра, пашкоджаныя сцены і столі. Людзей, якія праз выбух засталіся без даху над галавой, прапануюць даць прытулак спагадныя гараджане. Аб'явы жыхары размяшчаюць у сацсетках.

- Выстройваюцца чэргі, каб здаць кроў для пацярпелых.

- А як тлумачаць, што адбылося?

- У навінах перадаюць, што зваршчыкі рамантавалі дзвярны замак у ангары, дзе захоўвалася канфіскаваная салетра. Ад іскры пачаўся пажар - і адбыўся выбух.

Нагадаем, раней тэлеканал Al Hadath, са спасылкай на кіраўніка МУС Лібана перадаваў, што выбухнула аміячная салетра. 2 700 тон канфіскаванай салетры захоўваліся на адным са складоў і здэтанавалі падчас правядзення зварачных работ.