Ад пандэміі пацярпела адно з самых прыбытковых прадпрыемстваў Гомеля

ААТ «Гомельшкло» прыпыняла працу ў сувязі з эпідэміялагічнай сітуацыяй.

Пра гэта распавёў старшыня Гомельскага аблвыканкама Генадзь Салавей у тэлеперадачы «Дыялог» на тэлеканале «Беларусь 4 Гомель». Нагадаем, што за 2019 год прадпрыемства ўвайшло ў пяцёрку самых прыбытковых акцыянерных таварыстваў Гомельскай вобласці.

На днях ААТ «Гомельшкло» наведаў старшыня Камітэта дзяржаўнага кантролю Іван Церцель.

«Гэта горадаўтваральнае прадпрыемства, тут працуюць амаль 2 тысячы чалавек. У 2010 годзе яно было мадэрнізаванае, працуе дастаткова паспяхова, захоўваючы моцны калектыў. Ёсць праекты па мадэрнізацыі і далейшаму нарошчванню магутнасцяў, заваяванні новых рынкаў. Цяпер кіраўніцтва прапрацоўвае варыянты для наступнага абнаўлення, і дзяржава падставіць плячо ў гэтай сітуацыі. Для гэтага ёсць усе неабходныя інструменты», - сказаў Іван Церцель.

Як удакладнілі на прадпрыемстве, сітуацыя на сусветнай арэне, якая абвастрылася праз пандэмію каранавіруснай інфекцыі, адбілася і на працы завода. Мэтавыя рынкі за мяжой закрыліся. У свой час кіраўніцтвам ААТ «Гомельшкло» на ўзгадненне з Міністэрствам архітэктуры і будаўніцтва была прынятая пастанова аб зніжэнні прадукцыйнасці ліній ліставога шкла пад паступіўшыя заказы. Дзякуючы гэтаму ўдалося выстаяць і захаваць калектыў. З траўня сітуацыя пачала выраўноўвацца, штодня нарошчваюцца аб'ёмы паставак на экспарт.

За час абмежаваных адгрузак спецыялісты праводзілі маніторынг шклянога рынку, пазначалі кола патэнцыйных партнёраў, працавалі над напаўненнем партфеля заказаў. Сёння на прадпрыемстве гатовы аператыўна рэагаваць на рост попыту і істотна нарошчваць аб'ёмы вытворчасці. Больш за 75% прадукцыі «Гомельшкла» адпраўляецца на экспарт. На еўрапейскім рынку запатрабаванае шматслаёвае загартаванае шкло. Асноўныя партнёры - Украіна і Расея.