Адна гадзіна са Святланай Ціханоўскай
25- 6.08.2020, 9:59
- 59,835
Гісторыя робіцца сёння.
Тэлеканал «Белсат» наведаў штаб Святланы Ціханоўскай, каб убачыць як праходзіць дзень самай медыйнай кандыдаткі ў прэзідэнты.
Дамаўляемся на здымкі з прэс-сакратаркай Святланы Ціханоўскі, Ганнай Красулінай:
«А 14 Святлана будзе ў штабе і дае інтэрв'ю. А 18 у штабе Бабарыкі (папулярны расейскі YouTube канал) размаўляе з Ціханоўскай, Калеснікавай і Цапкалай».
Штаб Ціханоўскай знаходзіцца ў цэнтры Менска, на апошнім паверсе гандлёвага цэнтра. Гэта вузкі пакой з адным акном, дзе змяшчаецца два сталы і вузкая шафа.
Святлана дае інтэрв'ю знакамітаму амерыканскаму папяроваму выданню праз тэлефон на ангельскай мове.
Па заканчэнні Красуліна дае час на перапынак, кандыдатка выходзіць перадыхнуць у калідор, дзе яе чакае кампанія маладых людзей:
- Святлана, можна зрабіць з вамі фота?
- А вы белыя стужкі надзелі?
У гэты момант прыходзіць яшчэ дзве здымачных групы буйных СМІ з Нямеччыны і ЗША.
Пакуль аператары наладжваюць тэхніку, Святлана развязвае бягучыя пытанні праз тэлефон. У гэты час мужчына ў футболцы «Краіна для жыцця» прыносіць халодную ваду.
Адно інтэрв'ю кандыдатка дае па-расейску, другое - па-ангельску. Трымаецца ўпэўнена, дае разгорнутыя выразныя адказы.
На тэлефон Святланы пастаянна паступаюць паведамленні і званкі. Яна адключае гук падчас запісу відэа.
У гэты час прэс-сакратарка дае каментар Belsat.eu наконт пікету, які павінен адбыцца 6-га жніўня.
Пасля заканчэння шэрагу інтэрв'ю Святлана ўцякае на сустрэчу. Праз паўтары гадзіны ў Ціханоўскай новае інтэрв'ю.