«Апошні цвік у труну эканомікі»

Як выбух у Бейруце паўплывае на сітуацыю ў Лібане.

Не менш як 135 чалавек загінулі, дзясяткі прапалі без вестак, блізу 5 тысяч параненыя пасля выбуху ў порце Бейрута. Выбухная хваля адчувалася нават на Кіпры - за некалькіх сотняў кіламетраў. Горад абвешчаны зонай бедства, шпіталі перапоўненыя. На аднаўленне спатрэбяцца некалькі мільярдаў даляраў.

Ці чакае Лібан гуманітарная катастрофа, і як трагедыя паўплывае на палітыку на Блізкім Усходзе, журналісты currenttime.tv запыталіся ва ўсходазнаўцы Марыяны Беленькай.

- Шмат хто кажа пра тое, што, увогуле, апошні цвік у труну лібанскай эканомікі быў забіты. Там краіна-банкрут, краіна ніяк не магла дамагчыся міжнароднай дапамогі, ёй усе адмаўлялі, казалі, што ніякай дапамогі не будзе да таго часу, пакуль лібанцы не возьмуцца за рэформы. Грошай не было. Неабходная дапамога для Лібана на момант яшчэ да выбухаў, да COVID-19 налічвала дзясяткі мільярдаў даляраў, якія патрабаваліся Лібану, каб аднавіць сваю эканоміку, выйсці з дэфолтнага стану. Зараз гэтых грошай спатрэбіцца як мінімум удвая болей.

Не вераць міжнародныя інстытуты Лібану, што Ліван здольны правесці рэформы. Даваць грошы краіне як у чорную дзірку ніхто не хоча, і так ва ўсіх досыць вузкі ліміт гэтых сродкаў, асабліва на фоне каранавіруса. Плюс ёсць фактар "Хэзбала", гэта асобны момант, што частка лібанскіх банкаў, палітыкаў знаходзяцца пад амерыканскімі і еўрапейскімі санкцыямі праз "Хэзбалу" найперш. Гэта таксама не дадае даверу лібанскай эканоміцы і лібанскім палітыкам.

Лібан - вельмі маленькая краіна з вельмі вузкай праслойкай палітычнай эліты, якая звязаная яшчэ і этнаканфесійным чыннікам. Іншых палітыкаў, па сутнасці, ўзяць няма адкуль. Усе міністры так ці інакш звязаныя з нейкімі палітычнымі групамі, этнаканфесійнымі групамі. Спрабавалі стварыць кабінет тэхнакратаў на гэты раз, але таксама не вельмі атрымалася. І ўсё адно рэформы нікуды не рухаюцца.

Лібан - такі маленькі дэтанатар усяго Блізкага Усходу, дзе ўсе праблемы, якія ёсць на Блізкім Усходзе, назапашваюцца ў Лібане. Палестына-ізраільскі канфлікт адбіўся хваляй палестынскіх уцекачоў у Лібане, што абярнулася практычна 25-гадовай грамадзянскай вайной у краіне, якая проста ўзарвала дысбаланс, і ад вынікаў гэтай вайны толькі-толькі Лібан стаў выбірацца. І вось зноў усё павалілася. Трагедыя яшчэ ў чым – што толькі адбудавалі пасля вайны тую частку Бейрута, якая была разбураная цалкам, і гэта ўсё зноў ляжыць у руінах.