Апытанне: Украінцы гатовыя правесці ў Раду чатыры партыі
9- 6.08.2020, 16:18
- 15,401
Рэйтынг «Слугі народа» прадаўжае падаць.
Калі б выбары ў Вярхоўную Раду адбыліся найбліжэйшым часам, у парламент прайшлі б чатыры партыі.
Такія вынікі апытання, праведзенага Сацыялагічнай групай Рэйтынг, піша «Новое время».
Прэзідэнцкую партыю «Слуга народа» гатовыя падтрымаць 25,9% украінцаў сярод тых, хто вызначыўся з выбарам і будзе галасаваць. Партыю «Апазіцыйная платформа - За жыццё» падтрымліваюць 17,6% апытаных, «Еўрапейскую салідарнасць» - 15,7%, УА «Бацькаўшчына» - 10,4%.
Іншыя партыі не пераадольваюць неабходны бар'ер 5% галасоў выбарнікаў. Не праходзіць у Раду і партыя «Голас», яе гатовыя падтрымаць 2,6% украінцаў.
Апытанне праводзілася з 5 жніўня. Было апытана 2000 чалавек метадам фармалізаванага інтэрв'ю ва ўсіх рэгіёнах Украіны, за выключэннем акупаваных тэрыторый Данбаса і Крыма. Статыстычная хібнасць не перавышае 2,2%.
Паводле вынікаў аналагічнага апытання ў пачатку ліпеня «Слугу народа» былі гатовыя падтрымаць 28% выбарнікаў, «Апазіцыйную платформу ˗ За жыццё» - 16% апытаных, «Еўрапейскую салідарнасць» - 14%, УА «Бацькаўшчына» ˗ 10%.