Беларуская чыгунка атрымала двайны ўдар

Сітуацыя ў стратэгічнай галіне паказвае маштаб эканамічнага крызісу ў краіне.

Беларуская «чыгунка» цяжэй за ўсе астатнія тыпы транспарту пераносіць падзеі 2020 года. Спачатку па перавозках ударыла Расея, а затым дадаўся ўплыў пандэміі, пішуць banki24.by.

Чыгунка ў Беларусі традыцыйна з'яўляецца адным з найважнейшых тыпаў транспарту як паводле аб'ёму перавозак грузаў, так і паводле пасажырскай плыні.

Калі за 6 месяцаў 2020 года пасажыраабарачэнне ў цэлым склала 9,107 млрд пасажыра-кіламетраў, то асобна паводле чугуначных - 1,825 млрд пас-км. Пры гэтым пасажыраабарачэнне чыгуначнага транспарту скарацілася значна больш, чым пасажыраабарачэнне ў сярэднім у краіне - на 40,2% супраць 28,4%.

Грузаабарачэнне чыгуначнага транспарту склала за паўгода 20,049 млрд тона-кіламетраў, тады як усё грузаабарачэнне Беларусі - 58,522 млрд т-км. Грузаабарачэнне «жалязякі» асела на 16,5%, а «сярэдняя тэмпература ў шпіталі» - на 7,3%.

Перавозкі грузаў чыгуначным транспартам за 6 месяцаў знізіліся на 18,6% да 58,6 млн тон. Транзітныя перавозкі скараціліся яшчэ мацней - на 38% да 12,8 млн тон. Жорсткае скарачэнне транзітных перавозак тлумачыцца падзеннем попыту на грузы ў Еўропе і Расеі ў сувязі з карантынам.

Аб'ём пагрузкі асноўных тыпаў грузаў на чыгуначным транспарце склаў 38,3 млн т, што на 9,7% менш, чым у 1 паўгоддзі 2019 года. Самае жорсткае падзенне выпрабавала такая катэгорыя грузаў, як нафта і нафтапрадукты - на 24,3% да 6,4 млн тон.

У 1 квартале перавозкі вадкіх вуглевадародаў пакутавалі праз нафтавую вайну паміж Беларуссю і Расеяй. У 2 квартале дадалося падзенне попыту на асноўных экспартных рынках праз каранакрызіс.

Пагрузка будаўнічых грузаў на чыгуначны транспарт знізілася на 12,4% да 10,6 млн т, хімічных і мінеральных угнаенняў - на 8,3% да 7,2 млн тон, цэменту - на 2,2% да 1,8 млн т, чорных металаў - на 11,3% да 1 млн т. Цікава, што негатыўная дынаміка пагрузкі цэменту паглыбляецца.

Гэта супадае з дынамікай вытворчасці цэменту. Калі ў сакавіку выпуск цэменту (без клінкераў цэментных) вырас у фізічным вылічэнні на 10,5%, то ў чэрвені скараціўся на 7,5%. Прэс негатыўных вонкавых чыннікаў не мог не адбіцца на занятых у галіне і на іх заробках. Нават у намінале сярэдні заробак на пасажырскім чыгуначным транспарце за паўгода ўпаў на 4,7%, на грузавым - на 1,9%.

Налічаны фонд заробку на пасажырскім чыгуначным транспарце скараціўся на 11,7%, на грузавым - на 6,5%. У 2020 годзе ў галіне колькасць звальненняў кратна пераважала над колькасцю закрытых вакансій.

Так, за 6 месяцаў на кожных 100 звольненых на пасажырскім чыгуначным транспарце прыйшлося ўсяго 39,6 прынятых, на грузавым - 35,4%. На чыстай аснове галіну пакінулі 1,9 тысяч чалавек.