Нафта таннее

«Чорнае золата» таннее на фоне нявызначанасці вакол аднаўлення попыту.

Цэны нафты зніжаюцца ў пятніцу праз боязь, што рост попыту на паліва сыдзе на нішто на фоне павелічэння колькасці выпадкаў заражэння каранавірусам, у той час як перамовы ў ЗША аб новых мерах стымулявання эканомікі зайшлі ў нявыкрутку, паведамляе Reuters.

Ф'ючарсы на нафту маркі Brent знізіліся на 0,13% да $45,03 за барэль да 09:24 паводле Менску, на WTI - збавілі 0,17% да $ 41,88 за барэль.

Рост колькасці новых выпадкаў заражэння каранавірусам застаецца галоўнай прычынай нявызначанасці на нафтавым рынку, паколькі менавіта ад гэтага будзе залежаць, наколькі хутка будзе аднаўляцца попыт на паліва. Статыстыка паказвае, што колькасць выпадкаў заражэння ў ЗША расце ў шэрагу штатаў, у тым ліку ў Каларада, Агаё і Віргініі.

"Гэта сапраўды ўплывае на сітуацыю з попытам", - сказаў стратэг рынку ў AxiCorp Стывен Інэс.

Лідары дэмакратаў у Кангрэсе ЗША і галоўныя памочнікі прэзідэнта Дональда Трампа ў чацвер не змаглі дамагчыся істотнага прагрэсу ў перамовах аб новым законапраекце аб эканамічных стымулах для барацьбы з наступствамі пандэміі.