Беларусь ужо «праела» чвэрць еўрабондаў

Што адбываецца з дзяржаўнай казной?

Нацбанк апублікаваў статыстыку пра ЗВР, дзе паказаў невялікі рост рэзерваў у параўнанні з 1 ліпеня. Разбіраемся, што на самай справе адбылося з дзяржгаманцом і да чаго ўсё ідзе, пішуць banki24.by.

Паводле разлікаў рэгулятара, золатавалютныя рэзервы (ЗВР) павялічыліся за ліпень на 61,8 млн USD і склалі да 1 жніўня 8,857 млрд USD.

Аднак усяго некалькі дзён таму Нацбанк вуснамі намесніка старшыні Сяргея Калечыца сцвярджаў, што да канца года рэзервы могуць упасці да 7,3 млрд USD. Ці няма тут супярэчнасці?

Ніякай супярэчнасці няма. Проста трэба разабрацца, за кошт чаго на паперы растуць афіцыйныя рэзервы. У чэрвені ЗВР Беларусі павялічыліся на 916,4 млн USD. У тым месяцы Мінфін атрымаў грошы ад размяшчэння еўрабондаў на 1,25 млрд USD і гэта дазволіла дадаць іх да рэзервах.

Месяц таму мы падлічылі, што калі б не еўрабонды і не рост кошту золата, памер ЗВР скараціўся б прыкладна на 300 млн USD. Яшчэ адзін важны факт: два месяцы запар Нацбанк не згадвае, што крыніцай папаўнення рэзерваў з'яўляюцца ягоныя аперацыі ў набыцці валюты.

Гэта значыць, што ў чэрвені і ліпені НБРБ выступаў чыстым прадаўцом валюты на рынку. Паводле словаў Калечыца, «неспрыяльныя знешнія ўмовы, якія склаліся ў першай палове года, негатыўна паўплывалі на сітуацыю на ўнутраным валютным рынку, што абумовіла продаж Нацбанкам замежнай валюты».

Згодна з Калечыцам выходзіць, што сальда набытку-продажу валюты НБРБ паводле вынікаў 6 месяцаў склалася не на карысць рэгулятара. А цяпер дадайце да гэтага, што Нацбанк не змог выкупіць валюту яшчэ і ў ліпені. Такім чынам, за 7 месяцаў НБРБ прадаў валюты яшчэ больш, чым за 6.