Ва Узбекістане ўступныя іспыты ў ВНУ правядуць на стадыёнах

Яны будуць праходзіць двойчы на дзень - у прахалодны час дня.

Улады Узбекістана праз пандэмію каранавіруса даручылі правесці ўступныя іспыты ў вышэйшыя навучальныя ўстановы на стадыёнах.

Пра гэта паведаміла прэс-служба прэзідэнта Шаўката Мірзіёева пасля нарады ў арганізацыі прыёму абітурыентаў, паведамляе «Радыё Свабода».

Такую пастанову ўлады патлумачылі тым, што зачыненыя памяшканні не адпавядаюць эпідэміялагічным патрабаванням і недастаткова ёмістыя, каб забяспечыць сацыяльную дыстанцыю.

Іспыты на стадыёнах прапануюць праводзіць двойчы на дзень - у прахалодны час дня. Увесь працэс плануецца скончыць за 12-14 дзён. Міністэрствам і ўстановам даручана «старанна» падрыхтаваць стадыёны і паведаміць студэнтам пра іх дыслакацыі.

Сёлета для навучання ў вышэйшых навучальных установах краіны выдзелена больш за 162 тысяч месцаў у бакалаўрыяце і больш за 10 тысяч у магістратуры. У 91 ВНУ краіны дакументы падалі больш за 1,4 мільёна чалавек, на адно месца прэтэндуюць блізу 11 абітурыентаў.

Паводле афіцыйных звестак, ва Узбекістане на каранавірусную інфекцыю захварэлі 28 809 чалавек. Аднак незалежныя крыніцы сцвярджаюць, што колькасць памерлых нашмат перавышае афіцыйную статыстыку.