Літва і Польшча падпісалі дэкларацыю з абяцаннем дапамогі беларускаму народу

У дакуменце змяшчаецца заклік да правядзення новых выбараў у Беларусі.

Урады Літвы і Польшчы падпісалі дэкларацыю, у якой утрымліваецца абяцанне дапамагчы «беларускім людзям у іх імкненні жыць у вольнай і дэмакратычнай краіне», паведамляе Сharter97.org са спасылкай на прэс-службу ўрада Літвы.

У дакуменце, падпісаным прэм'ер-міністрамі Польшчы і Літвы, утрымліваецца заклік «як мага хутчэй правесці свабодныя і дэмакратычныя выбары» ў Беларусі.

У дакуменце падкрэсліваецца, што ўрады Літвы і Польшчы зацвердзілі захады падтрымкі жыхарам Беларусі, якія дапамогуць ахвярам рэпрэсій і людзям, якім патрабуецца медыцынскае лячэнне або дапамога, а таксама падтрымаюць студэнтаў, навукоўцаў, прадстаўнікоў культуры і мастацтва, якія пазбавіліся працы праз свае погляды.