Прэзідэнт Літвы адказаў Лукашэнку

Гітанас Наўседа заявіў, што на дзеянні афіцыйнага Менска рушыць услед люстраны адказ.

18 верасня праз тэлефон паразмаўлялі прэзідэнт Літвы Гітанас Наўседа і прэзідэнт Польшчы Анджэй Дуда. Галоўнай тэмай была Беларусь. Напярэдадні Аляксандр Лукашэнка нечакана заявіў, што закрывае межы з Польшчай і Літвой, умацоўвае мяжу з Украінай. Пакуль мяжы не закрытыя. Суседзі нашай краіны яшчэ спадзяюцца, што гэта было чарговае «эмацыйнае выказванне». Аднак гатовыя даць «адэкватны адказ».

Я мяркую, што гэта правакацыя без канкрэтных падставаў, - цытуе словы літоўскага прэзідэнта ягоная прэс-служба. - Улады некаторых краін проста забываюць, што ў міжнародных дачыненнях дзейнічае люстраны прынцып - межы можна закрыць з абодвух бакоў».

Нагадаем, учора Лукашэнка заявіў, што «закрывае мяжу з Літвой і Польшчай».