«Працоўныя вельмі злыя»: Як на МАЗе праходзіць «італьянская» забастоўка
19- 19.09.2020, 13:25
- 53,624
Планавыя паказнікі за жнівень праваленыя.
Менскі аўтамабільны завод знізіў аб'ёмы вытворчасці тэхнікі ў жніўні. Стачкам мяркуе гэта вынікам нашага італьянскага страйку, пішуць naviny.by.
У жніўні ў Беларусі было выраблена 68 аўтобусаў, што на 53% менш за ліпень, сведчаць звесткі Белстата. Вытворчасць грузавых аўтамабіляў знізілася на 23% – да 405 штук.
У стачачным камітэце Менскага аўтамабільнага завода зніжэнне паказнікаў патлумачылі італьянскай забастоўкай, якую вядуць працоўныя.
Спікер страйкаму Сяргей Гульцоў апублікаваў у сеціве звесткі пра зборку тэхнікі на заводзе сёлета. З іх вынікае, што ў жніўні план вытворчасці не быў выкананы. Замест 732 машынаў вырабілі 562. У папярэднія месяцы максімальнае адставанне ад плана было меншым за 10%, а ў жніўні план не быў выкананы на 23%.
Найбольшае адхіленне ад плану было зафіксаванае з 17 да 20 жніўня і з 27 да 28 жніўня, а таксама 31 жніўня.
«Людзі не любяць чуць пра італьянскую забастоўку. Яна не такая прыгожая і выразная, як мітынг на тэрыторыі, як адкрыты пратэст. Але адкрыты пратэст лёгка здушыць, адміністрацыя гэта ўмее. Актыўныя людзі сыдуць з прадпрыемства, астатнія прыціхнуць, – напісаў Сяргей Гульцоў. – А можна нават слова “забастоўка” не гаварыць, проста рабіць як мага менш – хто гэта вылічыць? Тых, хто не даруе адміністрацыі шматгадовага скоцтва, сотні. Замест падзякі дырэктары крычаць, працу са сваім інструментам прымаюць за належнае, пры спробе абмеркаваць – перабіваюць, паказваюць, хто галоўны, валакуць на пасады толькі сваіх. Працоўныя вельмі, вельмі злыя».