«У дэкларацыю запісаў нават шакаладку»

Рэпартаж з беларуска-літоўскай мяжы пасля ўзмацнення кантролю.

«Фуры даглядаюць доўга, нават адну шакаладку прыйшлося ўносіць у дэкларацыю, са спіртным разгортваюць», - дзеляцца ўражаннямі з tut.by кіроўцы, якія перасякалі ў апошні дзень літоўска-беларускую мяжу.

Супярэчлівыя аповеды пра тое, што адбываецца на мяжы сталі паступаць у рэдакцыю яшчэ ў пятніцу, 18 верасня. Рана раніцай у суботу журналісты адправіліся да пункта пропуску «Каменны Лог».

«У дэкларацыю давялося запісаць нават шакаладку»

Нагадаем, яшчэ 10 верасня занепакоіліся міжнародныя аўтаперавозчыкі: фірмы пачалі атрымліваць непадпісаныя папярэджанні аб тым, што фуры з балтыйскімі нумарамі і грузам з Літвы, Латвіі, Эстоніі будуць затрымліваць на мяжы для вялікага дагляду. Інфармацыю пра гэта ДМК Беларусі тады не пракаментаваў.

А ўжо 18 верасня мытнікі паведамілі пра ўзмацненне кантролю на мяжы з Еўразвязам, асабліва ў дачыненні да фізічных асоб. Пры гэтым, як падкрэслілі ў ДМК, нормы ўвозу тавараў засталіся ранейшымі.

Яшчэ да атрымання афіцыйнай інфармацыі ад ДМК Беларусі чытачы пачалі дасылаць у рэдакцыю паведамленні аб тым, што на мяжы з Польшчай, Літвой, Латвіяй дальнабойнікаў «сур'ёзна трасуць»: правяраюць наяўнасць новага тавару ў транспарце, а міжнароднікаў, якія вязуць груз з Прыбалтыкі, даглядаюць часам ад некалькіх гадзін да некалькіх дзён.

Кіроўца-міжнароднік з Беларусі Алег распавёў, што ўчора заехаў на пункт пропуску «Каменны Лог» з Літвы і затрымаўся там на некалькі гадзін.

- Мытнікі пыталіся, ці ёсць які-небудзь новы тавар, які я вязу для сябе. У мяне былі пара красовак, шакаладка, гель для душа і дзве пачкі памперсаў. На ўсё гэта прыйшлося запаўняць дэкларацыю, - распавёў кіроўца. - Мытнікі сказалі, што патрабуюць гэта ў адпаведнасці з Пагадненнем аб парадку перамяшчэння фізічнымі асобамі тавараў для асабістага карыстання праз мяжу.

Пакуль мужчына запаўняў паперы, бачыў, што некаторыя кіроўцы абураліся такой навіной, спрачаліся з мытнікамі, некаторыя, каб не затрымлівацца на мяжы, выкідалі набыты тавар у сметнік.

«Раней нас так не даглядалі»

А 10.00 суботы каля ПП «Каменны Лог» - зацішша. Павольна прасоўвалася чарга з грузавікоў, легкавік не прайшоў - ніводны.

За выездам з пункта пропуску ў чаканні рэйсавага аўтобуса стаяў мужчына з невялікай торбай і пакетам. Высветлілася, што гэта дальнабойнік, мужчына пераганяў сцэпку з цягача і паўпрычэпа на «транзітах» з Літвы ў Казахстан. Аўтацягнік застаўся на нашай мяжы, а кіроўца наважыў паехаць у Менск да сям'і.

- Заехаў на пункт пропуску ўчора каля паўночы, а выехаў вось толькі сёння амаль аб 11.00. Мытнікі сказалі, што будуць рабіць запыт у Літву: правяраць, ці правільна ў інвойсе ўказаны кошт счэпкі, якую я пераганяў. Раней таксама маглі затрымаць машыну, але вельмі рэдка, часцей прапускалі пад канвоем або з фінансавымі гарантыямі, што я прыбуду на мытню Казахстана, - распавёў мужчына.

Колькі менавіта прыйдзецца чакаць пацверджання кошту аўтацягніка, невядома. Са слоў кіроўцы, звычайна такія дакументы прыходзяць на працягу 10 дзён. Ніякіх пакупак з сабой мужчына не вёз.

- Я ўчора даведаўся, што ў аўто правяраюць наяўнасць новага тавару, таму нічога і не купляў. Ды мне і не занадта прыкра ад гэтага - бо ў Менску ўсё можна купіць, што ёсць у Вільні.

Кіроўца з'ехаў у сталіцу на рэйсавым аўтобусе Eurolines, які ехаў па маршруце Вільня - Менск. Пакуль ён садзіўся ў аўтобус, пасажырскі перавозчык распавёў, што праз затрымкі на беларускай мытні ён адстаў ад часу на дзве гадзіны.

- Правяралі маіх пасажыраў. Людзі не ведалі, што ад іх запатрабуюць запаўняць дэкларацыю, вельмі былі гэтым незадаволеныя.

Яшчэ адзін кіроўца, Мікалай, распавёў, што працуе восем месяцаў на літоўскай фірме. За ўвесь гэты час яго адпраўлялі на рэнтген-дагляд усяго адзін раз.

- Сёння я зноў праходзіў рэнтген - стаяў у чарзе тры гадзіны. Са мной побач былі і машыны з Расеі і Прыбалтыкі, але другіх было значна больш. На мяжы ўсё запоўнена грузавікамі – развярнуцца немагчыма.

Нягледзячы на тое, што ўнутры пункта пропуску машын шмат, з боку Літвы транспарт амаль не выязджае: за паўтары гадзіны выехала ўсяго адна легкавая машына, рэйсавы аўтобус і блізу пяці фур.

На бліжэйшым да ПП «Каменны Лог» АЗС «Беларуснафта» таксама нешматлюдна, хоць звычайна кіроўцы прыязджаюць сюды запраўляцца, аплачваць праезд па платных дарогах.

Дарэчы, кіроўцы, якія ехалі на расейскіх нумарах, казалі, што іх машыны прайшлі мяжу без затрымкі, а вось літоўцаў даглядалі «па-сур'ёзнаму».

Варта сказаць, былі і кіроўцы, якія прайшлі мяжу без нейкай узмоцненай увагі з боку супрацоўнікаў мытні.

- Я хутка праехаў, новыя тавары для сябе вёз, але мытнікам не казаў. Дык яны ж не пыталіся, чаго я сам буду прызнавацца! - засмяяўся Павел, які ехаў з Літвы ў Беларусь.

- У мяне было сёе-тое ў салоне і багажніку, мытнікі паглядзелі на пакеты, але нічога не спыталі, паказаць, што ўнутры пакетаў, не прасілі, вось я і паехала далей, - цешыцца шанцаванню беларуска, якая ехала з Літвы з маленькім сынам.