Стаматолаг з Берасця, якую паранілі амапаўцы, выйшла на працу

У жанчыну стралялі за тое, што яна заступілася за пратэстоўцаў.

Стаматолаг Вольга Рыбакова з Берасця, якая заступілася за людзей і атрымала рану ад амапаўцаў, сёння выйшла на працу, паведамляе «Радыё Свабода».

Увечары 10 жніўня Вольга Рыбакова з Берасця ўбачыла з балкона сваёй кватэры на чацвёртым паверсе, як людзі ў чорным жорстка затрымлівалі маладзёна і ўдарылі дзяўчыну. Вольга запатрабавала спыніць гвалт. У адказ сілавікі стрэлілі ў Вольгу гумавай куляй. Тая патрапіла Вользе ў ніжнюю частку жывата, разарваўшы мяккія тканкі. Жанчыну паклалі ў шпіталь.

«Сёння выйшла на працу»

У першы працоўны дзень пасля лячэння Вольга Рыбакова прыняла двух пацыентаў.

«Сёння я выйшла на працу і паволі пачынаю працаваць і вяртаюся да жыцця. Сёння два пацыенты, заўтра-тры, і паволі буду нарошчваць. Амаль паўтара месяца не працавала і пакуль не магу адразу вялікую нагрузку. Паціху ўсё прыйдзе ў норму».

Першую аперацыю Вользе зрабілі 10 жніўня, другую 2 верасня, а 14-га знялі швы.

«Спачатку мяне не зашывалі, абрэзалі ўсе разарваныя тканіны, і толькі 2 верасня зашылі», - распавяла яна.

Вольга зняпраўдзіла інфармацыю, якая з'явілася ў інтэрнэце, што яна нібыта ў цяжкім стане ў рэанімацыі.

«Дзякуй Богу, са мной усё добра. Трошкі баліць, але гэта ўсё пройдзе», - сказала яна.

«COVID ніхто не касаваў»

Апошнюю аперацыю Вользе рабілі ў апёкавым аддзяленні, бо там «падобная спецыфіка ран».

«У нас выдатныя лекары, кваліфікаваная дапамога, душэўныя людзі. Дзякуй Богу, усё добра. Лекары ў чыгуначнай лякарні меркавалі, што апераваць павінны спецыялісты, якія маюць справу з такімі ранамі. Таму яны не браліся мяне зашываць, бо спачатку павінна была быць сур'ёзная пластыка. Але я даволі нядрэнна гаілася, і мне зрабілі пластыку тканінамі, а гэта рана на жываце, скура на жываце добра цягнецца, проста адпластавалі скуру ад мышцы і падцягнулі яе. Спачатку папластава сшылі тканкі, а потым нацягнулі скуру», - кажа Вольга.

Вольгу выпісалі і параілі звярнуцца да траўматолага.

«Я сама медык, і калі мне знялі швы, я паабяцала свайму лекару, што я сама буду добра даглядаць сваю рану. Бо хадзіць на перавязкі трэба ў паліклініку, а там шмат людзей, і COVID ніхто не касаваў. Я прымала шмат антыбіётыкаў. Рана ўжо ў такім выглядзе, што не патрабуе адмысловага догляду. Трэба толькі, каб аднавілася адчувальнасць, цягліца не падцягвалася. На ўсе проста трэба час».

«Я страціла месяц лета»

Раней жанчына падала заяву ў Следчы камітэт з патрабаваннем правесці праверку і прыцягнуць вінаватых у раненні да адказнасці. Яна не ведае, ці разбіраюцца з яе заявай.

«Я думаю, што ў мяне гэтак жа, як і ва ўсіх. Пакуль справа, мабыць, на разглядзе, таму... Калі шчыра, не хацелася б пра гэта думаць, проста вярнуцца да нармальнага жыцця, проста шпацыраваць, атрымліваць асалоду ад восенні, працаваць, сустракацца са сваякамі, сябрамі. Бо я была выбітая з жыцця, і хочацца нагнаць упушчанае. Я страціла месяц лета, хочацца больш шпацыраваць, дыхаць і спадзявацца на самае лепшае для сябе».