Дзяўчына, у якую, «здаецца, усе закахаліся»

Журналісты пагаварылі з мянчанкай з тых самых фота з АМАПам.

«Здаецца, я закахаўся», - з такой подпісам па інтэрнэце разышліся здымкі дзяўчыны, якая паліць і якую вядуць пад рукі супрацоўнікі АМАП. Кадрамі з міліцыяй, здаецца, у Беларусі ўжо нікога не здзівіць, але выраз твару і цыгарэта ў руках гэтай мянчанкі ў момант зрабілі фатаграфіі мемнымі, паведамляе «Еўрарадыё».

«Еўрарадыё» звязалася з гераіняй віруснага фота, каб даведацца, хто яна, і пачуць гісторыю гэтага здымка.

Мянчанка Яна - байкерка, любіць падарожнічаць на матацыкле па Беларусі і да прэзідэнцкай кампаніі наогул не цікавілася палітыкай.

«Я раней была вельмі апалітычным чалавекам. Напэўна, як і ў многіх беларусаў была такая пазіцыя: няхай яны робяць што заўгодна, мне спакойна, і ўсё добра. Але проста ў нейкі момант цярпенне ўжо скончылася. Вельмі страшна жыць у краіне, дзе на паперы адно, а на справе іншае. Дзе чалавек не можа абараніць сябе пры дапамозе Канстытуцыі... Гэта вельмі крыўдна, гэта вельмі балюча», - расказвае дзяўчына.

20 верасня нядзельны Марш справядлівасці ў Менску не быў для дзяўчыны першай акцыяй пратэсту, але менавіта ў гэты вечар яна дэбютавала ў якасці затрыманай.

«Ішла ўжо дадому пасля акцыі на прыпынак. Ну і атрымліваецца, што крыху не дайшла. Я запаліла цыгарэту і перыферыйным зрокам убачыла, што ззаду двое амапаўцаў падлятаюць. Схапілі мяне пад рукі. Я не супраціўлялася. А сэнс мне супраціўляцца? Я ім адразу сказала: не трэба мяне цягнуць - я пайду сама. Але яны прадаўжалі мяне цягнуць. А я іду так важна, бо разумею, што гэта мая апошняя цыгарэта ў найбліжэйшыя дні. Так крыўдна было: толькі запаліла».

Затрыманне адбылося блізу 18:00 ля Акадэміі навук. Адтуль дзяўчыну на аўтазаку даставілі ў Савецкі РУУС. У дачыненні да Яны склалі два пратаколы: «Парушэнне парадку арганізацыі або правядзення масавых мерапрыемстваў» (23.34) і «Непадпарадкаванне законнаму распараджэнню ці патрабаванню службовай асобы пры выкананні» (23.4).

«Згодна з пратаколам я нейкаму маёру Любімаву і вопратку рвала пры затрыманні, і ў аўтазак упіралася лезці. Згодна з пратаколам здавалася, што я нейкая поўная вар’ятка. Ва ўсіх нас - а ў Савецкім РУУС было пяць дзяўчат - былі аднолькавыя пратаколы. І мы ўсе нібыта супраціўляліся гэтаму шматпакутнаму маёру Любімаву».

Але мы ж памятаем фота Яны, зробленыя пры затрыманні, - дзе там непадпарадкаванне?

Дзяўчына правяла ноч у Жодзінскім СІЗА, бо, як яна пачула ад супрацоўнікаў міліцыі, менскі ізалятар у завулку Акрэсціна ўжо быў перапоўнены.

На наступны дзень адбыўся суд. Дзяўчыне на пасяджэнні ўдалося давесці, што яна не супраціўлялася пры затрыманні, аднак яе прызналі вінаватай за ўдзел у несанкцыянаваным мерапрыемстве. Вынік - штраф у суме 135 рублёў ($52).

Пра тое, што яе фота сталі мемам, Яна даведалася ўвечары 21 верасня, калі вярнулася з Жодзіна ў Менск.

«Валанцёры, якія дзяжураць каля Жодзіна, давезлі мяне дадому. Мне застаецца некалькі метраў да пад'езда, і тут ад сяброўкі прылятае паведамленне - гэтая фатаграфія. Я пасмяялася, а потым панеслася - як плаціну прарвала. І гэтыя фота з кожнага праса. Я не чакала такога абсалютна. Тады нават не ведала, што мяне нехта здымае. І такі рэзананс, і столькі словаў падтрымкі - гэта нешта неймавернае».