Студэнтка БНТУ: Мы - рухальная сіла і за намі будучыня

Беларуска распавяла пра свой адзіночны пікет ва ўніверсітэце.

23 верасня тэлеграм-каналы абляцела фота студэнткі з БНТУ, якая выйшла на адзіночны пікет супраць умяшання адміністрацыі ўніверсітэта ў асабістае жыццё выкладчыкаў. Дзяўчына выйшла на перформанс з кветкамі, якія сімвалізуюць два сцягі, і з чорнай павязкай на вачах, на якой пералічаныя артыкула 28, 33 і 53 Канстытуцыі. Менавіта на іх, на думку студэнткі, заплюшчвае вочы рэктарат, перадае "Еўрарадыё".

"БНТУ проста заплюшчвае вочы на гэтыя артыкулы"

- Чаму вы адважыліся выйсці на адзіночны пікет?

- Зараз моцна ціснуць не толькі на студэнтаў, але і на супрацоўнікаў. І я хацела паказаць сваю салідарнасць з выкладчыкамі. Яны апынуліся ў такой сітуацыі, у якой даводзіцца падпісваць нейкія незразумелыя дакументы, якія абсалютна супярэчаць Канстытуцыі, гэта значыць найвышэйшаму Закону. Гэтыя дакументы абвяшчаюць аб тым, што супрацоўнікі павінны паводзіць сябе прыстойна ў грамадскіх месцах, якія не выказваць сімпатыю або антыпатыю палітычным партыям, у непрацоўны час паводзіць сябе гэтак жа, як і на працы, не гаварыць пра палітыку.

Я спецыяльна прапісала на масцы артыкулы Канстытуцыі, каб паказаць, што БНТУ проста заплюшчвае вочы на гэтыя артыкулы.

"Усе глядзелі, як кіраўніцтва сядзіць на лавачках і "кантралюе сітуацыю"

- Чаму не атрымалася масавай акцыі?

- Пры кожным манеўры налева-направа на студэнтаў моцна ціснуць, і не ўсе гатовыя выказваць сваё меркаванне публічна. Усе вельмі баяцца адлічэнняў і нейкіх санкцый. У БНТУ шмат разумных хлопцаў, якія маюць уласнае меркаванне што да сітуацыі ў Беларусі, але яны проста не могуць яго выказаць, бо іх запалохалі.

Калі сёння абвясцілі, што адбылася інаўгурацыя, студэнты ўніверсітэта хацелі разам сабрацца ля галоўнага корпуса. Але кіраўніцтва, мабыць, даведалася аб гэтых намерах. Увесь рэктарат і вышэйшая адміністрацыя выйшлі і селі на лавачкі, кантралявалі сітуацыю. У мяне не атрымалася выйсці каля галоўнага корпуса, як я планавала раней, таму я правяла акцыю ўнутры студэнцкага гарадка. Прастаяла нядоўга, бо разумела, што там не вельмі шмат людзей. Усе глядзелі, як кіраўніцтва сядзіць на лавачках і "кантралюе сітуацыю".

- А вы ўсё ж не пабаяліся выйсці, ды яшчэ і адна...

- Як гаворыцца, вочы баяцца, а рукі робяць. Аднагрупнікі мяне падтрымалі, сказалі, што я разумніца і малайчына, і гэта мне надае сіл.

Падазраю, што мяне выклічуць ў дэканат і папросяць растлумачыць, чаму я гэта раблю. Але з падтрымкай іншых студэнтаў, салідарных са мной, я змагу выстаяць.

Маўчанне выкладчыкаў

- Як цяпер абстаноўка сярод навучэнцаў універсітэта і выкладчыкаў?

- У верасні студэнты спрабавалі рабіць нейкія грамадскія мерапрыемствы, але адміністрацыя БНТУ гэта адразу пагасіла, сказала, што не дапусціць ніякіх масавых мерапрыемстваў на тэрыторыі свайго універсітэта. У выніку студэнтамі была прынятая іншая стратэгія - хлопцы, як партызаны, лепяць стыкеры на сценах універсітэта, і гэта натхняе. Мы робім гэта, каб іншыя бачылі, што нас відавочна не меншасць.

На жаль, выкладчыкі маўчаць. Мы бачылі шмат прыкладаў салідарнасці ад выкладчыкаў іншых ВНУ - да прыкладу, БДМУ, МДЛУ. Але ў БНТУ такога не было, і цалкам магчыма, што гэта звязана з тым самым дакументам, які супрацоўнікаў просяць падпісаць.

- Гэта апошняя акцыя ад вас ці не? Што далей?

- Я не ведаю, як усё гэта будзе паварочвацца далей. У кожным выпадку, я гатовая падтрымаць іншых студэнтаў, бо мы ва ўніверсітэтах - гэта рухальная сіла, і, гледзячы на МДЛУ і БДУ, я разумею, што за намі будучыня.

Для тых, хто не ведаў, што значаць гэтыя тры артыкулы, нагадаем, што артыкул 28 Канстытуцыі РБ абвяшчае: "Кожны мае права на абарону ад незаконнага ўмяшання ў ягонае асабістае жыццё, у тым ліку ад замаху на тайну яго карэспандэнцыі, тэлефонных і іншых паведамленняў, на яго гонар і годнасць".

Артыкул 33 Канстытуцыі Беларусі: "Кожнаму гарантуецца свабода меркаванняў, перакананняў і іх свабоднае выказванне".

Артыкул 53 Канстытуцыі Беларусі: "Кожны абавязаны паважаць годнасць, правы, свабоды, законныя інтарэсы іншых асоб".