Казахстан цалкам скасаваў смяротнае пакаранне

Мараторый на смяротнае пакаранне дзейнічаў у Казахстане з 2003 года.

Казахстан цалкам скасаваў смяротнае пакаранне, далучыўшыся да міжнароднага пратаколу аб адмене гэтага тыпу пакарання. "Сталы прадстаўнік Казахстана пры ААН Кайрат Умараў падпісаў Другі факультатыўны пратакол да Міжнароднага пакту аб грамадзянскіх і палітычных правах, накіраваны на скасаванне смяротнага пакарання", - гаворыцца ў паведамленні МЗС Казахстана, апублікаваным у чацвер, 24 верасня, паведамляе Deutsche Welle.

Пра пастанову Казахстана далучыцца да гэтага дакумента раней паведаміў прэзідэнт краіны Касым-Жомарт Такаеў падчас выступу з прамовай на агульнапалітычных спрэчках 75-й сесіі Генеральнай Асамблеі ААН. Ён падкрэсліў, што Казахстан - прыхільнік рэалізацыі асноватворнага права на жыццё і чалавечую годнасць.

Пра намер урада Казахстана скасаваць смяротнае пакаранне і далучыцца да пратакола стала вядома яшчэ ў снежні 2019 года. "Надышоў таксама час для развязання пытанняў, якія актыўна падымаліся нашымі праваабаронцамі", - заявіў тады Такаеў.

Мараторый на смяротнае пакаранне

У Казахстане з 2003 года дзейнічаў бестэрміновы мараторый на выкарыстанне смяротнай кары. Пры гэтым само смяротнае пакаранне як тып крымінальнага пакарання мараторыем не касавалася і магло быць прыведзенае ў выкананне праз год пасля скасавання мараторыя. Смяротнае пакаранне ў Казахстане прадугледжвалася па шэрагу артыкулаў, звязаных з тэрарызмам і вайсковымі злачынствамі.

З 2004 года ў Казахстане замест смяротнага пакарання ўжывалі пажыццёвае пазбаўленне волі. Цяпер у зняволенні ў рэспубліцы знаходзіцца толькі адзін смяротнік. Гэта "алма-атынскі стралок" Руслан Кулекбаеў, які быў прызнаны вінаватым у тым, што 2016 годзе ён расстраляў у Алма-Аце 10 чалавек.