Ніна Багінская: Буду хадзіць на мітынгі, пакуль мяне яшчэ ногі носяць

Масавасць і зацятасць прывядзе пратэстоўцаў да перамогі.

Легендарная 73-гадовая актывістка Ніна Багінская, зноў выйшла з бел-чырвона-белым сцягам на Марш, нягледзячы на тое, што даслоўна 26 верасня яе затрымліваў спецназ, паведамляе «Радыё Рацыя».

- Два сцягі мне апошнія аддалі. Учора не зламалі, аддалі. Так што міліцыя, я ўжо гляджу, не так моцна, але ўжо пачала глядзець на народ. І лозунг «міліцыя з народам» ужо пачаў дзейнічаць.

Ну, а я буду хадзіць, што мне застаецца? Я ж хачу назіраць, як моладзь пачала новы віток адраджэння. І хачу ў ім удзельнічаць. Вось я таму хаджу са сцягам. І буду хадзіць, пакуль ногі мяне носяць.

Са слоў Ніны Багінскай, дэманстрацыі вельмі важныя

«Такая масавасць і зацятасць прывядуць нарэшце да перамогі. Таму што людзі ў большасці ўжо стаміліся ад гэтай дыктатуры», - кажа Ніна Багінская.