Дэфіцыт рахунку бягучых аперацый перавысіў 1 млрд даляраў

Дэфіцыт плацёжнага балансу азначае, што рэжыму неабходна шукаць крыніцы для яго фінансавання.

За студзень-чэрвень 2020 года знешнеэканамічныя стасункі Беларусі з астатнім светам склаліся з дэфіцытам рахунку бягучых аперацый 1,1 млрд даляраў (3,9% ВУП), гаворыцца ў каментары Нацбанка да аплатнага балансу, паведамляе naviny.by.

За аналагічны перыяд мінулага года дэфіцыт бягучага рахунку складаў 0,8 млрд даляраў або 2,7% ВУП.

Паводле звестак Нацбанка, рост дэфіцыту бягучага рахунку ў гэтым годзе звязаны з двума фактарамі.

«На фармаванне дэфіцыту рахунку бягучых аперацый аказалі ўплыў адмоўнае сальда замежнага гандлю таварамі і адмоўнае сальда першасных даходаў», - паведамляе Нацбанк.

Варта адзначыць, што дэфіцыт рахунку бягучых аперацый паводле вынікаў паўгоддзя прыкладна такі ж як за ўвесь мінулы год (1,16 млрд даляраў). Пазалетась у плацежным балансе Беларусі назіраўся прафіцыт бягучага рахунку, які складаў 24,2 млн даляраў.

Плацежны баланс краіны адлюстроўвае суадносіны грашовых плацяжоў, якія паступаюць у краіну з-за мяжы, і ўсіх яе плацяжоў за мяжу. Кошт бягучых аперацый плацёжнага балансу ўключае знешнеэканамічныя аперацыі з эканамічнымі каштоўнасцямі. Пад бягучымі аперацыямі разумеюцца аперацыі з таварамі, паслугамі і даходамі.

Дэфіцыт плацёжнага балансу па бягучых аперацыях азначае, што рэжыму неабходна шукаць крыніцы для яго фінансавання - прыцягваць пазыкі, прадаваць актывы. Для Беларусі многія гады быў характэрны высокі дэфіцыт бягучага рахунку плацёжнага балансу. У 2007-2014 гадах праз рост коштаў на энэрганосьбіты, стымуляванне ўнутранага попыту дэфіцыт бягучага рахунку плацёжнага балансу перавышаў 5%, у асобныя гады - 10% ВУП.

З 2015 года, калі ўлады сталі абмяжоўваць грашовую прапанову і забяспечваць цэнавую стабільнасць, дэфіцыт бягучага рахунку стаў паступова змяншацца. У 2017 годзе дэфіцыт рахунку бягучых аперацый плацёжнага балансу склаў 1,7% ВУП, паводле вынікаў 2018 году - прафіцыт сумаю 0,04% ВУП, у 2019 годзе - дэфіцыт сумаю 1,8% ВУП.

Міжнародны валютны фонд рэкамендуе Беларусі праводзіць эканамічную палітыку, пры якой сума дэфіцыту рахунку бягучых аперацый не будзе перавышаць 2% ВУП.