Прэзідэнт Францыі Макрон выказаўся аб мірным пераходзе ўлады ў Беларусі
52- 29.09.2020, 15:19
- 47,863
Пра гэта ён заявіў пасля сустрэчы са Святланай Ціханоўскай у Вільні.
Францыя, Нямеччына і Еўразвяз імкнуцца падштурхнуць беларускія ўлады да згоды на пасярэдніцтва АБСЕ. Пра гэта прэзідэнт Францыі Эмануэль Макрон заявіў у аўторак на сустрэчы са студэнтамі Віленскага ўніверсітэта, паведамляе «Радыё Свабода».
«Мы гаварылі пра гэта з прэзідэнтам Расеі Уладзімірам Пуціным. Цяпер наша мэта палягае ў тым, каб такое пасярэдніцтва адбылося ў найбліжэйшыя дні або тыдні», - сказаў францускі лідар.
На ягоную думку, Беларусь «мае патрэбу ў такім працэсе, які б забяспечыў мірны пераход улады. Гэта дазволіла б прызнаць усе складовыя часткі грамадзянскай супольнасці краіны, забяспечыць вызваленне з турмаў тых, хто ўтрымліваецца там за сваю палітычную дзейнасць. І правесці свабодныя выбары пад міжнародным назіраннем.
«З гэтай мэтай мы, з аднаго боку, маем намер праводзіць палітыку ціску на Менск з дапамогай санкцый. А з іншага - весці дыялог з Расеяй, бо мы не зможам дамагчыся тут вынікаў без удзелу прэзідэнта Пуціна на гэтым этапе», - падкрэсліў Макрон.
«Мы ўжо цалкам выразна заяўлялі ў жніўні, што ўважалі б за памылку і недапушчальную правакацыю, калі б Расея ўмяшалася з выкарыстаннем вайскоўцаў або сіл паліцыі. Гэта павінна заставацца ўнутранай справай Беларусі, без умяшання яе суседзяў, і мы ўсе разам павінны весці справу да такога пасярэдніцтва», - дадаў французскі лідар.