Студэнт БДУ пра настроі ў ВНУ: Сёння зразумеў, што з рэжымам гатовыя змагацца практычна ўсе

Беларусы не вераць у сістэму адукацыі, якая за 26 гадоў дыктатуры толькі дэградавала.

- 1 верасня я думаў, што сярод маіх аднагрупнікаў не вельмі шмат людзей, гатовых актыўна пратэставаць. 30-га зразумеў, што з рэжымам гатовыя змагацца практычна ўсе, - піша тэлеграм-каналу «Беларусь страйкуе!» студэнт трэцяга курса фізфака БДУ. - У тэлеграм-каналах я бачу шмат «рэпартажаў з месца падзей» пра тое, як студэнты выходзяць пратэставаць і як іх затрымліваюць, але нідзе не заўважаў інфармацыі аб тым, як настроі студэнтаў змяняюцца ў часе, а як па мне - цяпер гэта нават важней.

Калі я ўпершыню ўбачыўся са сваімі аднагрупнікамі 1 верасня, было зразумела, што супраць Лукашэнкі усе, але дзесьці толькі чвэрць людзей была гатовая выйсці на пратэстныя акцыі, і тое, выглядала так, што яны самі не былі ў гэтым упэўненыя. На сёння хаця б на адным пратэсце пабывалі ўсе без выключэння. Зразумела, што ўсё не вернецца ў сваё рэчышча, пакуль пацук не сыдзе.

Што яшчэ цікава, відавочна, практычна ўсе аднагрупнікі не вераць у сістэму адукацыі, якая за 26 гадоў дыктатуры толькі дэградавала. Гледзячы на студэнтаў цывілізаваных краін, разумееш, што ты не вучышся, а боўтаешся ў нейкай спадчыне эпохі брэжнеўскага застою, але вельмі хутка ўсё зменіцца, і гэты вецер перамен адчуваецца ўсё больш і больш відавочна.