SpaceX атрымала ад Пентагона кантракт на запуск 28 спадарожнікаў

Памер угоды склаў $ 150 мільёнаў.

SpaceX атрымала ад Пентагона кантракт на запуск 28 ваенных спадарожнікаў да канца 2022 года. Пра гэта паведаміла выданне Spacenews.com са спасылкай на Мінабароны ЗША. Памер угоды склаў 150 мільёнаў даляраў, паведамляе «Радыё Свабода».

На арбіту плануецца адправіць 20 апаратаў, прызначаных для забеспячэння сувязі паміж наземнымі станцыямі і нізкалётнымі аб'ектамі, у ліку якіх – іншыя спадарожнікі, МКС, а таксама пілатаваныя самалёты і дроны. Астатнія восем спадарожнікаў будуць выконваць функцыю папярэджання ракетных пускаў.

Адбор кампаніі на ролю выканаўцы гэтай місіі ажыццяўляла Агенцтва касмічнага развіцця ЗША. У якасці крытэраў яно паказвала аптымальны кошт, прапанаваны графік пускаў і мінулы досвед.

У апошнія гады Мінабароны ЗША ўсё часцей звяртаецца па паслугі да прыватнай касмічнай кампаніі Ілана Маска. Шматразовыя ракеты сямейства Falcon, уключаючы звышцяжкія Falcon Heavy, неаднаразова выкарыстоўваліся для дастаўкі ў космас сакрэтных ваенных апаратаў. Апошні такі пуск адбыўся 19 снежня. У 2019 годзе SpaceX атрымала ад ВПС ЗША кантракт на 28 мільёнаў даляраў за выкарыстанне сеткі спадарожнікаў Starlink для тэставання зашыфраванага інтэрнэту.