Кампанія Microsoft запатэнтавала спосаб лічбавай рэінкарнацыі кожнага чалавека 2.0

Мяркуючы з усяго, найбліжэйшым часам яшчэ адзін сюжэт «Чорнага люстэрка» стане рэальнасцю.

Паводле дакументацыі, даступнай на рэсурсе «Ведамствы па патэнтах і таварных знаках ЗША» (USPTO), цяжка судзіць, на якой стадыі знаходзіцца распрацоўка. Але апісанае функцыянаванне сістэмы выклікае выразныя асацыяцыі з мастацкімі творамі ў жанры кіберпанк. Фактычна, Microsoft збіраецца ствараць лічбавыя копіі жывых або памерлых асоб у выглядзе інтэлектуальнага лічбавага суразмоўцы, піша Naked science.

Псіхалагічны профіль чат-бота будзе фармавацца на аснове цэлага спектру розных звестак. Сярод іх выявы, голас, запісы ў сацыяльных сетках, электронныя лісты і паведамленні ў мэсэнджары. Фактычна - усе формы інфармацыі, якія апісваюць або створаныя патрэбным чалавекам. На базе гэтых звестак ствараецца адмысловы індэкс, які і будзе вызначаць характэрныя асаблівасці «асобы» бота. Мяркуючы па выкарыстанні тэрміна «навучанне», алгарытм будзе ўключаць нейрасеціва, аднак наўпрост гэта ў заяўцы не пазначанае.

Затое ў ёй падрабязна апісаныя схемы рэалізацыі такога сэрвісу. Для загрузкі інфармацыі пра чалавека, якога патрабуецца «рэінкарнаваць», могуць быць выкарыстаныя як мабільныя прылады (планшэт ці смартфон), так і ўсе кампутары. Сістэма будзе кліент-сервернай: для стварэння індэкса, трэніроўкі бота і захоўвання ўсіх звестак плануецца выкарыстоўваць аддалены вэб-партал.

Акрамя тэкставага чат-бота, які імітуе персанальныя асаблівасці канкрэтнага чалавека, прадуктам гэтага сэрвісу можа быць двухмерная або трохмерная графічная мадэль чалавека, а таксама персаналізаваны сінтэзатар галасы. Гэта значыць, «рэінкарнацыя» будзе не толькі пісаць, як сапраўдная асоба. Яна зможа выглядаць і размаўляць, як патрэбны чалавек. У заяўцы не ўдакладняецца, ці прызначаная гэтая распрацоўка для імітацыі жывых людзей, альбо яе збіраюцца выкарыстоўваць для лічбавага ўваскрашэння тых, хто ўжо памёр.

Лічбавая рэінкарнацыя асобы - папулярны сюжэт фантастычных фільмаў і кніг. Сярод найбольш вядомых твораў можна ўспомніць першую серыю другога сезона серыяла «Чорнае люстэрка». Сюжэт гэтага эпізоду антыўтапічнай анталогіі апавядае пра жанчыну, якая страціла каханага мужчыну. Яна не можа справіцца з горам і становіцца кліенткай сэрвісу, які ўзнаўляе лічбавую копію памерлага чалавека. Штучны інтэлект імітуе яе загінулага партнёра, прачытаўшы ўсе запісы, якія той рабіў у сацыяльных сетках.

Такія ідэі некалькі разоў з пераменным поспехам ужо спрабавалі ўвасабляць у жыццё. Сюжэт «Чорнага люстэрка» фактычна быў працытаваны Яўгеніяй Куйдай пасля таго, як яе блізкі сябар і калега Раман Мазурэнка загінуў у аўтамабільнай аварыі. Журналістка і прадпрымальніца ў галіне IT, Яўгенія папрасіла каманду праграмістаў стварыць чат-бот, які імітуе Рамана.

Алгарытм навучылі на выбарцы звестак, складзеных з допісаў, паведамленняў і тэкстаў, напісаных Мазурэнкам. Такое «ўваскрашэнне» памерлага сябра не прынесла палягчэння нікому з блізкіх загінулага. Аднак, праца не прапала дарэмна. Яна легла ў аснову прыкладання Replika. Яно выйшла ў 2018 годзе і прадстаўляе з сябе віртуальнага суразмоўцу, здольнага падтрымаць размову і дапамагчы справіцца з цяжкімі перыядамі ў жыцці.