Да канца тыдня ў Беларусі чакаюцца маразы да -25°С

У краіне значна пахаладае.

Вышыня снежнага покрыва ў Беларусі паводле звестак на раніцу панядзелка складае ад 1 да 26 сантыметраў, а самыя высокія гурбы - 30 см - адзначаны ў Барысаве. Да снегападаў далучацца і маразы: у выходныя ў асобных раёнах на паўночным усходзе краіны ў начныя гадзіны паветра можа ахаладзіцца да -20... -25°С. Пра гэта паведамляе tut.by са спасылкай на Белгідрамет Мінпрыроды.

Гэты тыдзень у Беларусі адзначыцца прыходам сапраўднай зімы. Атмасферныя франты ад Паўночнаатлантычны цыклонаў будуць фармаваць ападкі ў выглядзе снегу, істотна пахаладае.

12 студзеня ў аўторак, месцамі ў краіне пройдзе невялікі снег. На асобных адцінках дарог галалёдзіца. Вецер паўднёва-заходні, паўднёвы сярэдні, удзень на захадзе парывісты. Тэмпература паветра мінімальная ўночы -3... -9°С, на паўночным усходзе да -11°С, максімальная ўдзень -4... +1°С.

У сераду, 13 студзеня, часам снег, слабая мяцеліца. На асобных адцінках дарог галалёдзіца. Вецер паўднёва-заходні, паўднёвы парывісты. Тэмпература паветра мінімальная ўночы -2... -9°С, максімальная ўдзень 0... -6°С.

14 студзеня, у чацвер, часам снег. На асобных адцінках дарог галалёдзіца. Тэмпература паветра цягам дня -7... -13°С, у паўднёва-заходніх раёнах -3... -6°С; у начныя гадзіны пераважна на паўночным усходзе месцамі да -14... -15°С.

У пятніцу, 15 студзеня, на большай частцы тэрыторыі Беларусі чакаецца кароткачасовы снег, слабая мяцеліца. На асобных участках дарог галалёдзіца. Тэмпература паветра на працягу дня -11... -18°С, уночы ў асобных раёнах да -21°С, на паўднёвым захадзе -9... -10°С.

У суботу, 16 студзеня, месцамі кароткачасовы снег. На асобных адцінках дарог галалёдзіца. Тэмпература паветра мінімальная ўночы -14... -21°С, у асобных раёнах -22... -25°С; максімальная ўдзень -11... -18°С, на паўднёвым захадзе -9... -10°С.

17 студзеня, у нядзелю, месцамі ў краіне кароткачасовы снег. На асобных участках дарог галалёдзіца. Тэмпература паветра мінімальная ўночы ад -10°С на паўночным захадзе да -22°С на паўднёвым усходзе Беларусі, максімальная ўдзень -5... -12°С; пераважна па ўсходняй палове краіны ўночы месцамі -23... -25°С, удзень у асобных раёнах -13... -15°С.

Сіноптыкі адзначаюць, што другая дэкада студзеня чакаецца халаднейшай, чым звычайна на 1-3 градусы (пры сярэдняй норме -3… -6°С).