Аляксандр Валадзько скончыў кар'еру футбаліста

Гэта адзіны футбаліст, які ў складзе БАТЭ ўдзельнічаў ва ўсіх яго пяці групавых этапах Лігі чэмпіёнаў.

Аляксандр Валадзько скончыў кар'еру футбаліста

Пра гэта паведамляе афіцыйны сайт БАТЭ.

Пастанову скончыць гульнявую кар'еру прыняў 34-гадовы Аляксандр Валадзько, з імем якога звязаныя ледзь не ўсе самыя паспяховыя старонкі гісторыі «жоўта-сініх». У нашу каманду ён перайшоў з берасцейскага «Дынама» летам 2008 года, акурат перад вызначальнымі матчамі кваліфікацыі Лігі чэмпіёнаў. Менавіта тады БАТЭ сенсацыйна ўпершыню здабыў тур у групу самага прэстыжнага клубнага турніру Еўропы. А дапамога Валадзько ў сярэдняй лініі мацёрым Аляксандру Ермаковічу і Дзмітрыю Ліхтаровічу выявілася вельмі дарэчнай.

Цягам першага барысаўскага перыяду Аляксандр правёў у БАТЭ амаль дзесяць сезонаў (2008-17) і быў адным з лідараў. Затым лёс ненадоўга звязаў яго з «Шахцёрам» - спачатку карагандзінскім з Казахстана, а затым салігорскім. У мінулым жа годзе Валадзько вярнуўся ў табар «жоўта-сініх» і дапамагаў камандзе ў меру сваіх магчымасцяў, а ў гэтым студзені наважыўся павесіць буцы на цвік.

Аляксандр абараняў не толькі клубныя колеры - выступаў у моладзевай і нацыянальнай камандах Беларусі. У суме ж за шаснаццаць гадоў у прафесійным футболе правёў 474 афіцыйныя матчы (забіў 26 галоў), ільвіная доля якіх прыпадае на БАТЭ. У складзе барысаўцаў у хаўбека 333 паядынкі (чацвёртае месца ўслед за Ліхтаровічам, Стасевічам і Радзівонавым), 20 мячоў і 31 дзейсная перадача. Прыводзім расшыфроўку гэтых гульняў: чэмпіянат Беларусі - 216 матчаў, 15 галоў + 19 «асістаў», Кубак Беларусі - 29, 0+7, Суперкубак Беларусі - 6,

0+0, Ліга чэмпіёнаў - 57, 4+5, Ліга Еўропы - 25, 1+0.

Валадзько - адзіны футбаліст, які ў складзе БАТЭ ўдзельнічаў ва ўсіх яго пяці групавых этапах Лігі чэмпіёнаў. Да таго ж ён гуляў і ў трох групавых раундах Лігі Еўропы. А на ўнутранай арэне разам з нашай камандай стаў дзесяціразовым чэмпіёнам Беларусі, пяціразовым уладальнікам Суперкубка краіны і адзін раз здабываў Кубак Беларусі.