СМІ: Чэмпіянат свету ў хакеі на мяжы пераносу з Менска

Паездка Фазэля скончылася правалам.

Калі ў панядзелак адна за адной з'яўляліся фатаграфіі з сустрэчы кіраўніка Міжнароднай федэрацыі хакея (IIHF) Рэнэ Фазэля з Лукашэнкам, а затым швайцарац пайшоў глядзець матч «Дынама» з Дзмітрыем Баскавым, здавалася, што пазіцыі ЧС-2021 у Менску моцныя, як абдымкі старых сяброў. Але ў аўторак і сераду з'явіліся новыя падрабязнасці, на падставе якіх можна зрабіць зусім іншую выснову — паездка Фазэля ў Менск скончылася поўным правалам, піша tut.by.

Навошта Фазэль наогул прылятаў у Менск?

Да канца восені пазіцыі прыхільнікаў чэмпіянату свету ў Беларусі сталі значна слабейшымі. Калі ў верасні за перанос выказваўся хіба што віцэ-прэзідэнт IIHF Калерва Кумала, то паступова сітуацыя пачала пагаршацца. Пратэсты не спыняліся, іх зноў пачалі жорстка разганяць, з'явіліся падазрэнні аб удзеле Дзмітрыя Баскава ў канфлікце на «Плошчы перамен», паўночныя краіны загаварылі пра байкот, а тут яшчэ і падаспела справаздачу экспэртнай камісіі з даволі несуцяшальнымі высновамі. Па-першае, праводзіць чэмпіянат у Менску проста цяпер было б немагчыма. Па-другое, афіцыйныя лічбы Беларусі аб каранавірусе вельмі сумнеўныя.

Варта разумець, што само па сабе парушэнне правоў чалавека - так сабе довад для IIHF. Палітвязні (хай і ў меншай колькасці) былі ў Беларусі і ў 2014 годзе, як былі і заклікі аб скасаванні ад палітыкаў, але рэальнай пагрозы пераносу чэмпіянату з Менска не было. Ён паспяхова адбыўся, а пасля заканчэння атрымаў ад Рэнэ Фазэля званне найлепшага ў гісторыі.

Цяпер сітуацыя зусім іншая, аб чым, дарэчы, швайцарац не забыўся згадаць на сустрэчы з Лукашэнкам. IIHF вельмі высока ацэньвае рызыкі пратэстаў у траўні. У федэрацыі бачылі, як іх разганяюць у Беларусі. Калі пры гэтым пацерпіць хтосьці з замежных гасцей, гэта стане іміджавай катастрофай для IIHF. Да таго ж бяспека заўзятараў і гасцей афіцыйна ўважаецца за падставу для пераносу або скасавання чэмпіянату. Ды і сам турнір на такім фоне - таксама ўдар для арганізацыі.

Разумеючы, што пазіцыі прыхільнікаў ЧС у Менску слабеюць, Рэнэ Фазэль пайшоў на рашучую спробу выратавання турніру. Ён адправіўся на сустрэчу са сваім сябрам Лукашэнкам, разлічваючы, што ў Беларусі ацэняць ягоныя намаганні і ўдасца знайсці кампрамісныя развязанні.

Што прапаноўваў Фазэль на сустрэчы?

Рэнэ выдатна ўсведамляе, што пратэсты самі па сабе не спыняцца, таму адзіны варыянт іх збіць - прапанаваць нешта, што магло б супакоіць людзей хоць бы на час чэмпіянату. Галоўная ідэя Фазэля — дыялог паміж уладай і апазіцыяй. Прычым не фіктыўны, а рэальны, які задаволіў бы ўсе бакі.

Калі б удалося яго арганізаваць, то Чэмпіянат цалкам імаверна атрымалася б захаваць, а хакей стаў бы моцнай аб'яднаўчай сілай. Акрамя гэтага прэзідэнта IIHF цікавілі пытанні COVID-19, расследаванне абвінавачванняў на адрас Дзмітрыя Баскава і сітуацыя з рэпрэсаванымі спартоўцамі.

Калі б Лукашэнка і беларускі ўрад зрабілі сур'ёзныя крокі насустрач, у прыхільнікаў заяўкі Менска былі б вельмі моцныя пазіцыі перад пасяджэннем рады IIHF.

Але, мяркуючы з усяго, прапановы Рэнэ Фазэля падтрымкі не знайшлі. Больш таго, за абдымкі з Лукашэнкам і фатаграфіі з Баскавым па ім жорстка прайшліся ў мясцовай прэсе.

Як распавёў віцэ-прэзідэнт федэрацыі Калерва Кумала, Фазэлю ўдалося дамагчыся згоды ў малазначных момантах, а ва ўсім астатнім была атрыманая адмова.

Пасля вяртання Рада IIHF сабрала канферэнцыю, дзе Рэнэ давялося апраўдвацца за фатаграфіі. Тое ж самае ён пазней рабіў перад швайцарскай прэсай. Фазэль прызнаваў, што «гуляў з агнём і апёкся», але ўсё ж выказаў надзею на крокі ў адказ з беларускага боку, нават заявіўшы, што многія недаацэньваюць, як сур'ёзна ўрад настроены на перамены.

У выніку ж Рэнэ Фазэль раскрытыкаваны прэсай і не дабіўся рэальнай узаемнасці на перамовах, а толькі атрымаў з Беларусі яшчэ адзін удар у выглядзе адказу аргкамітэта, які канчаткова знішчыў рэпутацыю швайцарца.

Толькі Фазэль пахваліў урад за гатоўнасць да дыялогу і зменаў у Канстытуцыі, як яму адказалі, што «ўвязваць Канстытуцыю з чэмпіянатам свету абсурдна», а «рэальны дыялог даўно ідзе праз дыялогавыя пляцоўкі». Ніякіх спартоўцаў у Беларусі не рэпрэсуюць, а ў дачыненні да Баскава дзейнічае прэзумпцыя невінаватасці. Затое гарантуюць, што інтэрнэт падчас чэмпіянату свету адключаць не будуць, а замежным журналістам дадуць акрэдытацыі.

А тут яшчэ і Лукашэнка на ўручэнні прэмій адправіў Фазэлю сігнал: калі чэмпіянат перанясуць, то не праз нас, а таму што вы саступілі пад ціскам заходніх палітыкаў.

Вось так жаданне Рэнэ Фазэля дамовіцца з Лукашэнкам стала поўнай катастрофай для прэзідэнта IIHF. Падчас размовы з журналістамі ён прызнаў, што цяпер памяняць публічнае меркаванне пра сябе будзе вельмі складана.

Што цяпер чакае Чэмпіянат свету ў Менску?

Фазэль чакае прыкметных крокаў з боку Беларусі ўжо ў найбліжэйшыя тыдні, але, здаецца, ужо і сам на іх не разлічвае. Са слоў Калерва Кумалы, Рэнэ выглядаў на канферэнцыі Рады IIHF разгубленым, здавалася, што ён ужо і сам пачынае сумнявацца, ці варта праводзіць чэмпіянат у Менску.

Сам жа Кумала практычна ўпэўнены, што чэмпіянат свету ў выніку адбудзецца, але толькі не ў Беларусі. Ён выступае за правядзенне ўсяго турніру ў Латвіі, але плячо IIHF ледзь што гатовая падставіць і Данія.

Канчатковая пастанова будзе прынятая не пазней 27 студзеня. Да гэтай даты Менск павінен зрабіць рашучыя крокі насустрач IIHF і дзеяннямі падмацаваць міратворчую ідэю Фазэля. Калі гэтага не адбудзецца, то кіраўнік Міжнароднай федэрацыі ўжо ніяк не зможа аргументаваць сваё жаданне пакінуць турнір у Беларусі.