У -11 марозу ў Новай Баравой прапала ацяпленне

Паглядзіце, як беларусы падтрымалі людзей, якія маюць патрэбу ў дапамозе.

Учора а 21:30 у Новай Баравой прапала ацяпленне, піша The Village Беларусь. Кіроўная кампанія А-100 у сваім тэлеграм-канале патлумачыла, што на кацельні ГП «Мінрайцепласець» здарылася аварыя, але аварыйная брыгада ўжо чыніць паломку. А 23:05 ацяпленне ў Новую Баравую вярнулася. Але за той час, пакуль яго не было, беларусы праявілі шакавальную салідарнасць: у чаце жыхароў з'явілася не менш за сотню паведамленняў ад менчукоў з іншых раёнаў з прапановай проста зараз прывезці абагравальнік або прыняць на начлег. Акрамя таго, за гэты час да чату далучылася некалькі сотняў новых удзельнікаў.

За апошнія месяцы Новая Баравая не першы раз застаецца без ацяплення, у мінулы раз, у лістападзе, там амаль тры дні таксама не было ні халоднай, ні гарачай вады. Жыхары думалі, што ўлады іх караюць за пратэстную актыўнасць, а ўлады паводзілі сябе дзіўна. Спачатку «Менскводаканал» не прызнаваў ніякіх аварый і паломак; пазней з'явіліся факты, што паломка сапраўды ёсць. На трэці дзень без вады дзяржСМІ паведамлялі, што праблема выпраўленая, засталося толькі праверыць якасць вады. Але ваду не ўключалі яшчэ амаль дзень. Спецыялісты казалі, што рамонт такой паломкі, якую ўдалося выявіць на адной з запорных засавак, займае 3-4 гадзіны. Беларусы і тады праявілі шакавальную салідарнасць - прывезлі ў раён сотні бутляў пітной вады. А жыхары Новай Баравой пасля гэтага на знак падзякі арганізавалі дваровую вечарыну для ўсіх, хто ім дапамагаў.