Чаму ў Беларусі адбыўся скачок інфляцыі?

Рост коштаў перасягнуў усе прагнозы экспэртаў.

Па выніках года інфляцыя перавысіла мэтавы параметр шмат у чым за кошт росту коштаў, найбольш схільных да ўплыву паслаблення беларускага рубля, а таксама падаражання асобных імпартаваных харчовых тавараў, пішуць naviny.by.

Як паведамлялася, за 2020 год прырост спажывецкіх цэн склаў 7,4% (пры афіцыйным прагнозе - 5%), за снежань - 1,2%.

У каментары Міністэрства антыманапольнага рэгулявання і гандлю адзначае, што ў гадавым вымярэнні ў студзені 2020 года рост спажывецкіх цэн склаў 4,7%, у лютым - 4,3%, сакавіку - 4,9%, красавіку - 5,4%, траўні - 4,9%, чэрвені - 5,2%, ліпені - 5,2%, жніўні - 5,6%, верасні - 6,1%, кастрычніку - 6,2%, лістападзе - 6,6%.

За год кошты плодаагародніннай прадукцыі выраслі на 16%, ЖКГ - на 8,3%, паслугі пасажырскага транспарту - на 23,1%, медыкаменты - на 9,8%, легкавыя аўтамабілі - на 15,2%, сувязь - 4, 7%.

«Стрымліванне росту рэгуляваных цэн (тарыфаў) і цэн сацыяльна значных тавараў дазволіла ўтрымаць іх ніжэй за ўзровень інфляцыі, у 2020 годзе іх прырост склаў 6,7 і 6% адпаведна», - адзначаюць экспэрты ведамства.

Паскарэнне гадавой інфляцыі ў снежні на 0,8 адсоткавага пункта абумоўлена, перш за ўсё, падаражаннем імпартаванай гародніны (за кошт сезоннага замяшчэння айчыннай гародніны імпартнымі, што ўзмацніла перанос уплыву курсавога чынніку).

Акрамя таго, захаваўся рост коштаў тавараў, якія ў Беларусі не вырабляюцца ці вырабляюцца ў недастатковай колькасці (алей, крупы, рыба).

Адначасова адзначаецца запаволенне росту коштаў на аўтамабільнае паліва (па ацэнцы, з 6,8% у гадавым вымярэнні ў лістападзе 2020 года да 3,7% у снежні), масла (з 4,5 да 1,4%), муку пшанічную ( з 1,6 да 1,1%), адзенне (з 4,2 да 3,6%). Соль за год патаннела на 9,7%, паведамляе МАРГ.

У сферы рэгуляванага цэнаўтварэння прырост цэн і тарыфаў за 2020 год склаў 6,7%. У снежні ў дачыненні да папярэдняга месяца планава падвышаны рэгуляваныя тарыфы на гарадскія пасажырскія перавозкі, паслугі пасажырскага чыгуначнага транспарту рэгіянальнага злучэнні эканомкласа, а таксама сувязі.