«Змена рэжыму цяпер - гэта факт, які не выклікае ніякіх сумневаў»

Пяць важных тэзісаў пасля зліву аўдыёзапісу з Карпянковым.

Сярод беларускіх сілавікоў Мікалай Карпянкоў, мабыць, адзін з самых прыкметных. Гэта ён разбіў дубінкай шкляныя дзверы кавярні ў цэнтры Менска, ён жа выдаў фразу: «Гэта вы [дэманстранты] фашысты, а не мы [сілавікі] – фашысты». Дзякуючы сваёй адданасці справе, Карпянкоў змог выбіць павышэнне з пасады начальніка ГУБАЗіК да намесніка МУС. А сёння BYPOL апублікаваў гучны зліў - 12-хвілінны маналог, у якім чалавек з голасам, падобным на голас Карпянкова, кажа аб стварэнні фактычна канцлагера для дэманстрантаў і прызнае, што катаванні і забойствы сілавікам дазволіў асабіста Лукашэнка, піша сайт kyky.org.

Стварэнне лагераў і забойства Аляксандра Тарайкоўскага. Пяць галоўных тэзісаў са злітага маналогу

У злітым 12-хвілінным запісе ёсць некалькі важных тэзісаў.

Па-першае, довад таго, што сілавікам дазволілі забіваць людзей і гарантавалі беспакаранасць на вышэйшым узроўні:

«Лукашэнка казаў, калі на цябе прэ – выкарыстоўвай зброю, атрымліваецца, вось несмяротнае. Ва ўпор: па нагах, у жывот, па яйках. Каб зразумеў, што ён стварыў, і што нарабіў, калі прыйдзе ў прытомнасць. Ну нанёс яму нешта ў такім ну выглядзе: альбо пакалечыць, альбо знявечыць, альбо забіць. Ужываць зброю яму проста ў лоб, проста ў лоб, проста ў твар, проста туды, пасля чаго ён ужо ніколі, атрымліваецца, не вернецца ў той стан, у якім ён знаходзіўся.

Ну, вярнулі ў прытомнасць, дык вярнулі. Не будзе ў яго паловы галаўнога мозгу, ну, туды яму і дарога <...> Кіраўніком дзяржавы мы прыкрытыя з усіх бакоў у плане ўжывання зброі».

Па-другое, дзякуючы гэтаму зліву ні ў кога не застанецца ілюзій, што сілавікі не ведаюць, як напраўду загінуў Аляксандр Тарайкоўскі. Крымінальную справу па факце яго забойства не распачынаюць, мабыць, зусім з іншых прычын.

«Зразумела, ад чаго памёр гэты п'яніца і дэбіл. Ён памёр, вядома, ад гумавай кулі, якая прыляцелі яму ў грудзі. Ён стаяў там у цішотцы. Я думаю, што са зваротнага боку майкі яна не затрымаецца».

Па-трэцяе, мы даведаліся, што беларускія сілавікі выкарыстоўваюць расейскую зброю.

«Таму мы звярнуліся [да Расеі]. Сказалі, што нам бракуе, атрымліваецца, траўматычнай зброі. Што нам у асноўным, атрымліваецца, даводзіцца вырашаць задачы гумовай палкай ці кулаком. Дзесьці за гэтым, у выключэнні, атрымліваецца, ужываць святлошумавыя гранаты, дзесьці ісці на пэўныя хітрыкі ў разблакаванні дарог. Але неабходная, вядома, нам траўматычная зброя. І вось, атрымліваецца, на ўказанне кіраўніка дзяржавы набыта, атрымліваецца, 100 пісталетаў: 30 пайшлі ў САХР, 20 пайшлі ў «Алмаз», а 50 пісталетаў перадалі нам».

Па-чацвёртае, сілавікі сур'ёзна разглядаюць стварэнне ў Беларусі лагераў для дэманстрантаў. З топкамі.

«Сказана распрацаваць, зрабіць лагер, ну не для ваеннапалонных, не для інтэрнаваных нават, а лагер для асабліва востракапытных, такі для адсялення. І паставіць калючы дрот, атрымліваецца, па перыметры. Два памяшканні зрабіць: топка - паверх, кармілі - паверх, каб працавалі. Але там іх трымаць, пакуль усё не супакоіцца».

Ну, і па-пятае, мяркуючы з палкіх цытат са злітага запісу, сілавікі вельмі баяцца за сябе і свае пасады.

«Прыйшоў час, калі ніводзін супрацоўнік органаў, нават амапавец, не павінен выходзіць на масавыя беспарадкі без агнястрэльнай зброі. Таму прыйшоў іншы час. Час жорсткіх дзеянняў з аглядкай на, так скажам, палітычныя моманты <...> Увесь час наносіць удары. Каб яны толькі паспявалі паварочвацца. Увесь час прадумваць камбінацыі. Увесь час атакаваць. Хто атакоўвае, той з'яўляецца гаспадаром становішча. Хто абараняецца - гэта ахвяра, дзічына».

Мяркуючы па рэакцыі беларусаў, не ўсе змаглі дачытаць ці даслухаць да канца гэты маналог. Як выйшла, што чалавек наогул змог яго вымавіць?

Мы проста нагадаем, што некалі казаў экс-намеснік баявой групы «Алмаз» Ігар Макар пра чалавека, голас якога нагадвае голас са злітага запісу: «Мікалай Карпянкоў у канцы дзевяностых кіраваў аддзелам у службе бяспекі прэзідэнта, і яны прыходзілі да нас у «Алмаз» на базу трэніравацца. Камандзір ставіў мяне на трэніроўку <...> Гэта вельмі адданы чалавек, асабліва Лукашэнку. Ён яму ніколі не здрадзіць, ён будзе рабіць усё. Як мне бачыцца, ягоная мара - стаць міністрам. Ён робіць усе, каб атрымаць гэтую пасаду. Дарэчы, Навумаў стаў кіраўніком службы бяспекі прэзідэнта менавіта з падачы Карпянкова. Далей Навумаў стаў міністрам, і гэта была ўжо ягоная заслуга. Мне пра гэта сам Навумаў казаў».

«Змена рэжыму цяпер - гэта факт не выклікае ніякіх сумневаў»: як рэагуюць беларусы

У МУС заявілі, што ад іх пакуль што афіцыйных каментароў на тэму зліву маналогу не будзе, а вось жонка забітага Аляксандра Тарайкоўскага Алена Герман наважылася выказацца адразу: «П'яніца і дэбіл? У мяне проста няма слоў. Як так можна? Яны забілі мірнага грамадзяніна, а цяпер яшчэ і абражаюць яго. Яны ж так і не распачалі крымінальнай справы. Мала таго, выставілі раней [Тарайкоўскага] тэрарыстам. Гэта проста жах, я не ведаю, што сказаць, не ведаю, як можна пракаментаваць такія словы. Проста жудасна. Я думаю, што гэта проста генацыд. У мяне няма спадзяванняў на нейкі справядлівы разгляд справы цяпер.

А выказванні Карпянкова проста не ўкладваюцца ў галаве. Проста забіваюць людзей. Як далей жыць у гэтай краіне, як тут выхоўваць дзяцей?», - запісаў словы Алены «Белсат».