«Нік і Майк»: У Генштабе прапанавалі стварыць спецатрад для ліквідацыі праціўнікаў Лукашэнкі

У групу павінны ўвайсці 30–40 чалавек.

Тэлеграм-канал «Нік і Майк» са спасылкай на свае крыніцы сцвярджае, што атрымаў інфармацыю пра чарговую злачынную прапанову з атачэння Лукашэнкі:

– Не паспелі прыйсці ў сябе ад размовы ў кабінеце кіраўніка КДБ Зайцава пра заказныя палітычныя забойствы 90-х і пачатку 2000-х, як з'явіўся Карпянкоў, які паказаў усю сваю пякельную сутнасць.

Цяпер прыляцела, адкуль не чакалі. Знаёмцеся, сціплы генерал-маёр, намеснік генеральнага штаба УС РБ Павел Мікалаевіч Муравейка. Той самы, які ў жніўні раіў беларусам не жартаваць з арміяй.

Але на гэтым выдатнік службы і годны паслядоўнік палітрукоў і кіраўнікоў заградатрадаў пастанавіў не спыняцца і паставіў сабе задачу пераплюнуць усіх у службовым запале.

Акулярык з добрым тварам Муравейка выступіў з ідэяй стварэння спецатраду (30–40 чалавек), які будзе займацца ліквідацыяй палітычных праціўнікаў за мяжой. Ідэя прыйшлася да спадобы галоўнаму вупыру. Так бы мовіць, падцерці нос Пуціну і ягонаму ФСБ, што з дзвюх спробаў не змагло забіць Навальнага.

У выпадку поспеху гаспадар абяцаў Муравейку запрасіць на пасаду міністра абароны. Ну, і яшчэ нейкія там выгоды. Самы тупы міністр абароны ў гісторыі Беларусі Хрэнін у такім раскладзе – на выхад.

Праўда, пакуль ахвотных надта няма, прафесіяналаў мала. Ёсць толькі адмарозкі тыпу Карпянкова. З такімі складана спадзявацца на поспех.

На заканчэнне гэтай гісторыі хочацца сказаць адно. У сучасным свеце інфармацыя вельмі хутка распаўсюджваецца, лічбавыя архівы не гараць, а злачынцы змушаюцца да адказнасці.