Чатыры сімптомы COVID-19, якія паказваюць на больш працяглы імунітэт да віруса

Новае даследаванне амерыканскіх спецыялістаў.

Згодна з новым даследаваннем навуковых спецыялістаў Універсітэта Вісконсіна (ЗША), у чалавека можа фармавацца больш працяглы імунітэт да каранавіруса, калі пры захворванні COVID-19 у яго назіралася некалькі пэўных сімптомаў, піша healthinfo.ua.

Як вядома, імунная сістэма арганізма, якая абараняе людзей ад хвароб, выпрацоўвае антыцелы для знішчэння патагенаў. Сведчаннем таго, як яна змагаецца з ўзбуджальнікамі інфекцый, якія трапілі ў цела чалавека, з'яўляюцца разнастайныя сімптомы. Каранавірус у розных людзей выклікае вельмі шырокі спектр станаў, ад лёгкіх і малапрыкметных да вельмі цяжкіх. Даследаванне амерыканскіх навукоўцаў звязвае пэўныя сімптомы, якія ўзнікаюць на працягу COVID-19, з працягласцю імунітэту, які фармуецца ў пацыентаў пасля ковіднай хваробы.

Вынікі гэтай працы былі апублікаваныя ў выглядзе версіі перад друкам і яшчэ не прайшлі рэцэнзаванне. Яе аўтары вылучылі чатыры сімптомы, якія паводле іх версіі могуць быць прыкметай таго, што ў чалавека хутчэй за ўсё разаўецца больш працяглы і ўстойлівы імунітэт да віруса SARS-CoV-2.

Ліхаманка. Стан ліхаманкі характарызуецца ростам тэмпературы цела з адначасовым адчуваннем дрыжыкаў. Згодна з новым даследаваннем, высокая тэмпература пры COVID-19 можа быць прыкметай таго, што імунная сістэма выпрацоўвае высокі ўзровень антыцелаў.

«Ліхаманка з'яўляецца прыкметай сістэмнай запаленчай рэакцыі, якая можа быць ключом да развіцця моцнага імуннага адказу з вытворчасцю антыцелаў супраць SARS-CoV-2», - пішуць аўтары праекту.

Страта апетыту. Даследчыкі канстатуюць, што страта апетыту, як і ліхаманка, паказвае на сістэмную рэакцыю, асацыяваную з магутным імунным адказам.

Дыярэя. Паводле звестак навукоўцаў, гэты сімптом рэгулярна выяўляўся у не шпіталізаваных пацыентаў з больш высокім узроўнем антыцелаў. Спецыялісты мяркуюць, што з'яўленне дыярэі падчас COVID-19 можа азначаць, што вірус працуе, каб узмацніць рэакцыю арганізма на антыцелы, актывуючы запаленчыя клеткі ва ўсім кішэчніку.

Спазмы ў жываце. У справаздачы даследнікаў гаворыцца, што пацыенты з COVID-19, у якіх падчас хваробы ўзнікалі болі ў жываце, мелі больш антыцелаў і больш працяглы імунітэт, чым тыя, у каго не было гэтага сімптому.

Адзначым, што высновы навукоўцаў грунтуюцца на выніках аналізу крыві 113 пацыентаў, інфіцыраваных каранавірусам. Падыспытных абследавалі двойчы - праз пяць тыдняў і праз тры месяцы пасля выздараўлення. Самі навукоўцы ўважаюць, што неабходныя дадатковыя даследаванні ў гэтым кірунку.